«Հնարավոր է հասնել հաջողության, եթե ամեն հայ մարդ գա, իր բաժին պատասխանատվությունը վերցնի, իսկ եթե բազմոցին պիտի նստեն, լայվով մեզ նայեն, հնարավոր չի»,-այս մասին այսօր Բաղրամյան-Դեմիրճյան փողոցների խաչմերուկում լրագրողների հետ ճեպազրույցում ասաց ՀՀԿ գործադիր մարմնի անդամ Էդուարդ Շարմազանովը։
Նրա կարծիքով՝ «Տավուշը հանուն հայրենիքի» շարժմանը հաջողվել է ժողովրդին հանել թմբիրից, հիմա քայլը ժողովրդինն է․ «Հիմա առաջնորդ էլ կա, ծրագիր էլ կա, եկեք այստեղ, ճնշումը մեծացնենք, որպեսզի մեր երկրի փշրանքները պահպանենք»։
Հարցին՝ առանց արտաքին ուժերի աջակցության հնարավո՞ր է հասնել հաջողության, Շարմազանովը պատասխանեց․ «Բայց մենք ի՞նչ գիտենք՝ ով ում է աջակցում։ Մենակ մի բան գիտեմ՝ Թուրքիան ու արեւմուտքը աջակցում են Նիկոլ Փաշինյանին, գոնե տեսանելի, բայց ոչ տեսանելին, չեմ կարող ասել»։
Արձագանքելով ԱԺ նախագահ Ալեն Սիմոնյանի այսօրվա հայտարարությանը, թե մի քանի օրից շարժումը Դեմիրճյան փողոցից վրանները հավաքելու է, Շարմազանովն ասաց․ «Այդ անձը քաղաքական օրենքներով պարկեշտության չափավոր բաժին եթե ունենար՝ հրաժարական տված կլիներ։ Եթե չեմ սխալվում՝ նա էր պատերազմից հետո ծափահարում ու ասում՝ ապագա կա Արցախում։ Եթե Արցախի հայաթափումն է Ալեն Սիմոնյանի խոստացած ապագան, ուրեմն պարկեշտ, դաստիարակված մարդիկ այդ ժամանակ լեզուն մտցնում են իրենց բերանն ու ատամների հետեւը»։
Կարդացեք նաև
«Քո հայրենիքը Աղդամը ավերված չի՞, գնա նուռ հավաքի Սուրեն Պապիկյանի հետ, եթե մարդու հայրենիքը գրավում են, ու դա ինքը ավերվածություն չի համարում, ուրեմն այդ մարդը կապերը խզել է բարոյական արժեքների հետ»։
Հիշեցնենք, շարժումը շարունակում է պահանջել կառավարության հրաժարականը։ Շարժման առաջնորդ Բագրատ սրբազանն էլ երեկ հայտարարել է, որ 4 օր են տալիս, որպեսզի ԱԺ-ում գումարվի կառավարության հրաժարականի հարցով արտահերթ նիստ։
Մանրամասն՝ տեսանյութում
Նելլի ԲԱԲԱՅԱՆ
