Ցանկացած երկիր սիրելու համար պետք է ոչ միայն այն գնահատել տեսարժան վայրերով, այլեւ զգալ համերը: Օրինակ Չեխիան միայն դղյակների ու գեղեցիկ շինությունների երկիր չէ, զբոսաշրջիկները Չեխիա ասելիս պատկերացնում են նաեւ գարեջուր ու հետաքրքիր խոհանոց:
Օրերս ֆեյսբուքի իր էջում Հայաստանի Հանրապետությունում Չեխիայի դեսպան Պետր Պիրունչիկը տեղեկացրել էր չեխական խոհանոցի երեկոյի մասին, նույն տեղեկատվությունը հրապարակված էր նաեւ դեսպանության ֆեյսբուքյան էջում:
Դեսպանը «Գաթա» պանդոկում հունիսի 7-ին հյուրընկալեց չեխական ընթրիքի մասնակիցներին, որոնք չեխական գարեջրի հետ համտեսեցին Չեխիայի Հանրապետության Արտաքին Գործերի նախարարության շեֆ խոհարար Վացլավ Պլեսլի պատրաստած յուրօրինակ ուտեստներն ու դեսերտը:
Կարդացեք նաև
«Ուրախ եմ բոլորիդ ողջունել այստեղ՝ սա չեխական ընթրիք է… Հիմա կներկայացնեմ մի մարդու, ում շնորհիվ այստեղ ենք գտնվում »,-ասաց դեսպանը ներկայացնելով շեֆ խոհարարին:
Պետր Պիրունչիկը խոսեց այն մասին, թե ինչ նշանակություն ունեն պանդոկներն իր հայրենիքում, ներկայացրեց չեխական նրբահամ խոհանոցի առանձնահատկությունները, ի թիվս այլնի՝ անդրադարձավ չեխական ազգային խոհանոցի այցեքարտային ուտեստին՝ կնեդլիկին:
Միջոցառմանը մասնակցում էին դիվանագետներ, արվեստագետներ, տարբեր ոլորտների ներկայացուցիչներ եւ պարզապես Չեխիայի դեսպանության բարեկամներ: Երեւանյան պանդոկը, հիրավի, վերածվել էր չեխական գողտրիկ միջավայրի:
Գոհար ՀԱԿՈԲՅԱՆ
