Հարկային օրենսգրքում նախատեսվող որոշ սկզբունքային փոփոխությունները տնտեսավարողների մոտ առաջացրել են որոշակի հարցեր. այս մասին ասել է ՀՀ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը:
Կառավարության հեղինակած «ՀՀ հարկային օրենսգրքում փոփոխություններ եւ լրացումներ կատարելու մասին» եւ կից ներկայացված օրենքների նախագծերի փաթեթը խորհրդարանն առաջին ընթերցմամբ ընդունել է 2024 թվականի մայիսի 2-ին:
Հունիսի 7-ին խորհրդարանում տեղի է ունեցել աշխատանքային քննարկում առաջարկվող փոփոխությունների վերաբերյալ, որին մասնակցել են ներկայացուցիչներ օրենսդիր եւ գործադիր մարմիններից, Փաստաբանական պալատից, Նոտարական պալատից, Հանրային պաշտպանի գրասենյակից, ինչպես նաեւ` մասնավոր հատվածից:
Քննարկման ընթացքում անդրադարձ է կատարվել իրավապաշտպան գործունեությանը, առաջարկվող կիրառելի շրջանառության հարկի դրույքաչափերի փոփոխության դեպքում իրավաբանական օգնություն մատուցող ծառայությունների թանկացման հավանականությանը, մարզերում հանրային սննդի ոլորտում գործունեություն իրականացնող ընկերությունների հետագա աշխատանքներին, օրենսդրական նախաձեռնության անցումային դրույթներին:
Կարդացեք նաև
Հանձնաժողովի նախագահի տեղակալ Բաբկեն Թունյանը, Ֆինանսների փոխնախարար Արման Պողոսյանը պատասխանել են քննարկման ընթացքում բարձրացված հարցադրումներին եւ դիտարկումներին:
Բաբկեն Թունյանը նշել է, որ փոփոխությունների ընդհանուր նպատակն է, որպեսզի բոլորն աշխատեն ընդհանուր հարկային համակարգում:
Ամփոփելով` նա նշել է, որ հնարավորության շրջանակում կփորձեն հավասարակշռված լուծումներ տալ:
ՀՀ Ազգային ժողով
