ԱԺ պաշտպանության եւ անվտանգության հարցերի մշտական հանձնաժողովի նիստում ՔՊ խմբակցության պատգամավոր Վահագն Ալեքսանյանը հարցրեց ՆԳ փոխնախարար Արփինե Սարգսյանին․ «Կա՞ քրեական վարույթ՝ կապված լրագրողների անձնական տվյալների հրապարակման ու նրանց նկատմամբ ատելության քարոզի վերաբերյալ, որովհետեւ վերջերս տելեգրամյան որոշ ալիքներ թիրախավորում են լրագրողներին։ Հրապարակվում են լրագրողների անձնական տվյալներ, եւ նրանց դեմ տարվում է ատելության քարոզ։ Եվ ես կհորդորեմ, որպեսզի դիմեն նման քրեական վարույթ հարուցելու նպատակով, որովհետեւ խիստ դատապարտելի երեւույթի հետ գործ ունենք»։
«Հայաստան» խմբակցության պատգամավոր Գեղամ Մանուկյանն արձագանքեց․ «Միանգամից փաստենք՝ լրագրողների կողմից զրպարտչական նյութեր, օրինակ, ԱԱԾ գործակալ լինել, Ռուսաստանից միլիոններ ստանալ, որոնք հերքվեցին »։ Հիշեցնենք, որ խոսքը «Տավուշը հանուն հայրենիքի» շարժման առաջնորդների մասին տարածված տեղեկությունների մասին է, որոնք ԱԱԾ-ն հերքեց։
Վահագն Ալեքսանյանը հարցրեց․ «Բայց ո՞վ է հերքել, ԱԱԾ-ն չի կարող հերքել Ռուսաստանի գործակալ լինելը»։
Կարդացեք նաև
Հանձնաժողովի ՔՊ-ական նախագահ Անդրանիկ Քոչարյանն էլ ասաց․ «ԱԱԾ-ն հերքել է, որ իր գործակալները չեն, թե ում գործակալներն են, դա դեռ ապագայում կճշտվի»։
Ռոզա ՀՈՎՀԱՆՆԻՍՅԱՆ
