Այսօր գյումրեցիները քաղաքի պատմական հատվածում՝ Գորկու զբոսայգում գտնվող «Թումո» ստեղծարար տեխնոլոգիաների կենտրոնի բակում ունկնդրեցին ԱՄՆ-ից ժամանած հնդկացիական «Սիհասին» (հայերեն թարգմանաբար նշանակում է «Հույս») ռոք խմբի համերգը։
Երաժշտական այս խմբի համերգային ծրագիրը սկսվեց «Արցախի ձայներ» երաժշտական խմբի ելույթով։
Նրանք մի քանի երգեր հնչեցրեցին Արցախի բարբառով, որն էլ ոգևորեց հանդիսատեսին։ Ի դեպ, նրանց մեծ մասը երիտասարդներ էին, համերգի ամբողջ ընթացքում հեռախոսներով նկարահանում էին, ձայնակցում երգիչներին։
Կարդացեք նաև
Բանն այն է, որ թե՛ «Սիհասին» ռոք խմբի և թե «Արցախի ձայներ» երաժշտական խմբի անդամներն ունեն ընդհանուր նպատակ՝ մշակութային ժառանգության պահպանումը։
«Սիհասին» խումբը հիմնադրել են քույր և եղբայր Ջենեդա և Քլեյսոն Բենալիները, որոնք Արիզոնայում գտնվող Նավահո պետությունից են։ Նրանք մրցանակակիր երաժիշտներ են, իրենց երաժշտության մեջ մարմանվորում են նավահոների ազգագրական երաժշտությունը և փանք ռոքի տարրերը։ Երաժիշտները մեծ ջանքեր են գործադրում Նավահո պետության մշակութային ժառանգության պահպանման ու տարածման համար։
Համերգի կազմակերպիչը ՀՀ-ում ԱՄՆ դեսպանությունն է, ծրագիրն իրականացվում է ԱՄՆ պետքարտուղարության «Ամերիկյան երաժշտությունն արտերկրում» ծրագրի շրջանակներում։
ԱՄՆ դեսպանության հանրային դիվանագիտության գրասենյակի ղեկավար Ջենիֆեր Մքէնդրյուն մեզ հետ զրույցում ասաց․ «Սիհասին» իրենց լեզվով՝ Նավահոյի լեզվով նշանակում է հույս, և նրանք շատ մեծ դեր ունեն մշակույթի պահպանության և ժառանգության փոխանցման հարցում։
Մշակույթի պահպանությունը շատ մեծ դեր է խաղում ԱՄՆ-ի և Հայաստանի միջև մշակութային կապերն ամրապնդելու համար և այդ է պատճառը, որ մենք այստեղ ենք հրավիրել «Արցախի ձայներ» խմբին, որպեսզի մասնակցեն այս գեղեցիկ իրադարձությանը։
Մենք գիտենք, որ ինչպես նավահո ցեղը, այնպես էլ Արցախն ունի մշակութային ժառանգության պահպանության խնդիր, և սա կլինի ուղերձ ամբողջ աշխարհի համար՝ պահպանել իրենց մշակութային ժառանգությունը։
Քանի որ Նավահո ցեղը մեծ ներդրում է ունեցել Ամերիկայի պատմության կերտման հարցում, այսօր մենք հրավիրել ենք, որպեսզի մեկ անգամ ևս ապացուցենք, որ այդ ներդրումը շատ կարևոր է Միացյալ Նահանգների համար»։
«Արցախի ձայներ» երաժշտական խմբի պրոդյուսեր, երգիչ, երգահան Արտեմ Վալտերն էլ նշեց, որ համերգը բացելու պատիվը իրենց է տրված, և սա ևս մեկ հնարավորություն է, որպեսզի աշխարհը տեսնի և լսի այն կարևոր խնդիր մասին, որի առջև կանգնել են։
«Ճիշտ է՝ բազմաթիվ խնդիրներ էլ կան, բայց այսօր արցախահայերն էլ ունեն մշակույթի պահպանության, լեզվի պահպանության խնդիր։ Հետաքրքիրն այն է, որ ԱՄՆ-ից եկած «Սիհասին» խմբի անդամներն էլ ունեն նույն խնդիրը, ու այն այսօր Գյումրիում մեզ բերել է նույն բեմի վրա։ Այստեղ ես սիմվոլիզմ եմ տեսնում ու կարծում եմ՝ այն կարևորագույն մեսիջ է աշխարհին։ Հայության համար էլ է սա կարևոր, Հայաստանի մի փոքր մասի մշակույթի պահպանության խնդիրն է»,-ասաց Արտեմ Վալտերը։
«Սիհասին» խմբի անդամներ, քույր և եղբայր Ջենեդա և Քլեյսոն Բենալիները ևս կարևորեցին «Արցախի ձայներ» երաժշտական խմբի հետ նույն բեմում ելույթ ունենալն ու մշակութային ժառանգությունը կիսելը։
«Լինել Հայաստանում, ճաշակել ուտելիքը, հիանալ գեղեցկությամբ, սա մեծ պատիվ է մեծ համար։ Մենք նախ Երևանում այցելեցինք Եղեռնի հուշահամալիր»,- ասացին նրանք։
Նրանց հնչեցրած երգերը նվիրված էին երիտասարդությանը, սերունդներին, կար նաև երգ վայրագությունների դեմ։
Նշենք, որ «Սիհասին» ռոք խմբի հաջորդ համերգը հունիսի 7-ին է՝ «Երևանի գինու օրեր» փառատոնին։ Այս խմբի անդամները հայաստանյան շրջագայության ժամանակ հայ երիտասարդ երաժիշտների ու երգահանների համար վարպետության դասեր կանցկացնեն։
Նունե ԱՐԵՎՇԱՏՅԱՆ
