Երեկ՝ հունիսի 4-ին, Մեդիա նախաձեռնությունների կենտրոնը (ՄՆԿ), իր գործընկերների՝ Երևանի մամուլի ակումբի (ԵՄԱ), Բազմակողմանի տեղեկատվության ինստիտուտի (ԲՏԻ) և International Media Support (IMS) դանիական կազմակերպության հետ միասին պաշտոնապես մեկնարկեց «Մեդիայի որակի և դիմակայունության նախաձեռնություն» ծրագիրը։
Ծրագրի նպատակն է խթանել լրատվամիջոցների՝ որակյալ և պատասխանատու բովանդակության ստեղծումը՝ դրամաշնորհների, դասընթացների, շահերի պաշտպանության և բարենպաստ աշխատանքային միջավայրին աջակցելու միջոցով։ Ծրագրի տևողությունը 38 ամիս է, բյուջեն կազմում է 530,370 եվրո, որից 400.000 եվրոն Եվրոպական միության կողմից տրամադրված դրամաշնորհն է, իսկ 130.370-ը՝ ԱՄՆ ՄԶԳ-ի կողմից ֆինանսավորվող և Հայաստանում Ինտերնյուսի գրասենյակի հետ համատեղ իրականացվող «Հայաստանի մեդիայի զարգացման ծրագրի» ներդրումն է։
Եվրոպական միության Համագործակցության ղեկավար Ֆրանկ Հեսսն իր ողջույնի խոսքում նշեց․ «Մեդիան պատասխանատու է հանրությանը ճշգրիտ և օբյեկտիվ տեղեկությամբ ապահովելու համար՝ վստահ լինելով, որ քաղաքացիները լավ տեղեկացված են և ունակ են մասնակցել քաղաքացիական կյանքին։ Բացի այդ, մեդիան պահապան շան դերում է՝ որոշում կայացնողներին հաշվետու պահելու և կառավարության և այլ գերատեսչությունների շրջանում թափանցիկության զորեղացման համար։ Անենք այնպես, որ օբյեկտիվ և ճշմարիտ տեղեկությունը հասանելի լինի բոլորին»։
Մեդիա նախաձեռնությունների կենտրոնի գործադիր տնօրեն, «Մեդիայի որակի և դիմակայունության նախաձեռնություն» ծրագրի ղեկավար Նունե Սարգսյանը հավելեց․ «Մեր նպատակը, որպես կազմակերպություն և մասնավորապես այս ծրագիրն իրականացնող, մարդկանց այնպիսի լրատվության տրամադրումն է, որը իմաստալից է, ժամանակին, արդիական, վստահելի և վերջապես՝ հետաքրքիր։ Սրանք որակյալ մեդիայի հատկանիշների մի մասն են, և մենք շարունակում ենք օգնել լրատվամիջոցներին անցնել այս ճանապարհը՝ չնայած բոլոր բարդություններին։ Պետք է նաև նշեմ, որ այս ծրագիրը համագործակցության լավագույն օրինակ է ինչպես գործընկերային աշխատանքի , այնպես էլ՝ միջազգային դոնոր կազմակերպությունների ջանքերը համատեղելու տեսակետից»։
Կարդացեք նաև
Առաջիկա երեք տարիներին «Մեդիայի որակի և դիմակայունության նախաձեռնություն» ծրագրով նախատեսվում է իրականացնել մի շարք գործեր։ ՄՆԿ-ի լրատվամիջոցների կառավարման առցանց դպրոցը դասընթացների նոր փուլ կսկսի, ԵՄԱ-ը կանցկացնի հրատապ խնդիրների լուսաբանմանը նվիրված դասընթացների շարք՝ «Համատեքստում» խորագրով, կշարունակվեն լրագրողների անվտանգությանն ուղղված վերապատրաստումները։
Ծրագիրը կաջակցի նաև լրատվական դաշտի օրենսդրական բարեփոխումների և քաղաքականության մշակմանը, ինքնակարգավորման մեխանիզմների զարգացմանը, այդ թվում լրատվամիջոցների Էթիկայի դիտորդ մարմնի գործունեությանը․ օրինակ՝ օմբուդսմենի ինստիտուտի գաղափարի առաջխաղացման նպատակով կազմակերպվելու է ուսումնական այցելություն Դանիա։
Ծրագրի շրջանակում լրատվամիջոցներին և լրագրողներին տրամադրվող դրամաշնորհների համար նախատեսված է 130.000 եվրո։ «Մեդիայի որակի և դիմակայունության նախաձեռնություն» ծրագիրը ներդրում է ունենալու փաստերի ստուգման լրագրության զարգացման, մեդիագրագիտության տարածման, «Բազմազանության լրատվության ձեռնարկ»-ի վերախմբագրված տարբերակի և «Թվապատում» լրագրողական մրցույթում երկու նոր անվանակարգերի ստեղծման գործում։
«Մեդիայի որակի և դիմակայունության նախաձեռնություն» ծրագիրը իրականացնում է Մեդիա նախաձեռնությունների կենտրոնը՝ Երևանի մամուլի ակումբի, Բազմակողմանի տեղեկատվության ինստիտուտի, «Միջազգային մեդիա աջակցություն» (IMS) կազմակերպության հետ համատեղ, Ինտերնյուսի Հայաստանում գրասենյակի մասնակցությամբ՝ Եվրոպական միության ֆինանսավորմամբ։
Մեդիա նախաձեռնությունների կենտրոն
