«Գեղարքունիքի մարզից ռուս սահմանապահ զորքերը դուրս են եկել 2022 թվականի սեպտեմբերյան դեպքերի նույն օրը՝ մի քանի ժամ առաջ»,- այսօր խորհրդարանում լրագրողների հետ ճեպազրույցում ասաց Գեղարքունիքի մարզպետ Կարեն Սարգսյանը։
Հարցին, թե այսինքն՝ ռուս սահմանապահները 2022 թվականին իրենց վստահված տարածքների՞ց են գնացել, մարզպետը պատասխանեց․ «Իմ պատկերացմամբ՝ այդտեղ տարածքները վստահված են եղել մեր պաշտպանության նախարարությանը։ Չեմ կարող մեկնաբանել, թե ռուսներն ինչ էին անում այնտեղ»։
Նա նշեց, որ 2022 թվականի հարձակումից առաջ ռուս սահմանապահները Սոթքի հատվածում են եղել։ «Մարզային իշխանությունների կողմից որեւէ հորդոր չի եղել, որ նրանք հեռանան»,- ասաց նա։
Մարզպետը հավելեց․ «Դրանից հետո ռուս սահմանապահները եղել են Վերին Շորժայի հատվածում, փորձել են որեւէ գործողություն կազմակերպել, նկատի ունեմ՝ հանդիպում ադրբեջանական զինված ուժերի հետ եւ ռմբակոծության տակ են ընկել։ Մամուլում շրջանառվել է այդ նյութը, բոլորդ տեսել եք, որ ռուսական մեքենաները եւս գնդակոծվել են։ Այդ տեխնիկաների վրա ռուսական դրոշները դրված են եղել»։
Կարդացեք նաև
Հարցին՝ հայտարարվեց, որ ռուս սահմանապահները Սյունիքից, Գեղարքունիքից, Վայոց Ձորից եւ Տավուշից դուրս են գալու, ինչի՞ մասին է խոսքը, եթե ինքն ասում է, որ Գեղարքունիքում ռուս սահմանապահներ չկան, մարզպետն ասաց, որ չի ցանկանում մեկնաբանել այդ հարցը։ Նա շեշտեց, որ Գեղարքունիքում ռուս սահմանապահներ չկան։
«2022 թվականի սեպտեմբերյան դեպքերից հետո երկու միջադեպ եւս եղել է, եւ մեր պաշտպանության նախարարությունը եւ զինված ուժերը կարողացել են իրենց առաջ դրված խնդիրները պատշաճ իրականացնել։ Մեր մարզում տեղակայված իքս բանակային կորպուսն իր առջեւ դրված խնդիրները կատարել է լիարժեք»,- հավելեց նա։
Ռոզա ՀՈՎՀԱՆՆԻՍՅԱՆ
Լուսանկարում՝ Գեղարքունիքի մարզպետ Կարեն Սարգսյանը Սոթք բնակավայրում դիտարկում է 2022 թվականի սեպտեմբեր ամսին ադրբեջանական ագրեսիայի հետևանքով հրետակոծությունից քանդված և քանդման ենթակա ճանաչված 4 տների կառուցման աշխատանքները: Լուսանկարը՝ մարզպետի աշխատակազմի ֆեյսբուքյան էջից
