Կազմակերպութեամբ ՀՅԴ Լիբանանի Կեդրոնական կոմիտէի քարոզչական մարմինին, Հայաստանի Հանրապետութեան հիմնադրութեան 106-ամեակին առիթով, չորեքշաբթի, 29 մայիս 2024-ի երեկոյեան ժամը 8:00-ին «Յակոբ Տէր Մելքոնեան թատերասրահին մէջ տեղի ունեցաւ ժողովրդային տօնակատարութիւն` «Ահա՛ զանգը Տաւուշէն» խորագիրով:
Քարոզչական մարմինին անունով ձեռնարկին բացման խօսքը արտասանեց Արամ Սոմունճեան, որ անդրադարձաւ 28 մայիսի անկախութեան նախորդող ժամանակաշրջանին ներքին ու արտաքին ճակատներու վրայ տիրող դժնդակ պայմաններուն, քաղաքական կացութիւններուն եւ նշեց, որ անկախութիւն յայտարարելու որոշումը դիւրին չէր, որովհետեւ դարերէ ի վեր առաջին անգամ ըլլալով հայութիւնը կ՛ունենար ազատ եւ անկախ պետականութիւն կերտելու գաղափար մը, որուն վարժ չէր տարիներով ստրուկ մնացած ժողովուրդը: Ասոր վրայ կու գային աւելնալու այլ բազմատեսակ` նիւթական, ընկերային, ապահովական եւ գումակային դժուարութիւններ, բայց եւ այնպէս, կերտուեցաւ այդ յաղթանակը, եւ Հայաստան դարձաւ անկախ, ազատ եւ ինքնիշխան:
«Մայիս 1918-էն 106 տարիներ ետք դարձեալ պահը օրհասական է: Թէեւ ունինք անկախ պետութիւն, բայց այս անգամ Թուրքիոյ կրստեր եղբայրը Ազրպէյճանն է, որ կը ներկայանայ խաղաղութեան պայմանագիրով մը: Պայմանագիր մը, որ դարձեալ գոյութենական վտանգի տակ կը դնէ Հայաստանի պետականութիւնը եւ ամբողջ հայութիւնը:
«Սակայն 1918-ի եւ 2024-ի միջեւ կայ հիմնական մէկ մեծ տարբերութիւն, այդ ալ հայկական բանակցող կողմի պատրաստակամութիւնն է` պաշտպանելու հայկական շահերը: 1918-ին հայկական կողմը պատրաստ էր ոչ մէկ զիջում կատարելու, այլեւ անհաւասար կռիւով կ՛ուզէր տէր կանգնիլ իր հողին եւ անկախութիւն հռչակել: Իսկ այսօր անկախ Հայաստանի իշխանութիւնները պատրաստ են ամէն բան ընելու` գոհացնելու համար Ազրպէյճանի եւ անուղղակիօրէն Թուրքիոյ պահանջները», ըսաւ Սոմունճեան:
Կարդացեք նաև
Ան շեշտեց, որ հակառակ իշխանական խաւին մօտ առկայ այս յանձնուողական տրամադրութեան` տակաւին գոյութիւն ունի 1918-ի տեսակի հայը, եւ այս տեսակի հայը Տաւուշէն ազդանշան տուած է միակողմանի զիջումներու մերժումի ալիքի` Հայաստանի իշխանութիւններու ապազգային քաղաքականութեան: «Կը զօրակցինք հայրենիքի ողբալի իրավիճակէն դուրս գալու համար ծայր առած սրբազան պայքարին` պաշտպանելու համար մեր ազգային արժէքները եւ Հայաստանի հողային ամբողջականութիւն ու կերտելու հայոց փայլուն ապագան», եզրափակեց Արամ Սոմունճեան:
Հոդվածն ամբողջությամբ՝ «Ազդակ» օրաթերթում:
