Տուժող կողմը չսպասեց դատավճռի հրապարակմանը
Երեխայի բարձրախոսը գողանալու հարցի շուրջ վեճ էր սկսվել «Տնային պայմաններում միայնակ տարեցների եւ հաշմանդամների սոցիալական սպասարկման կենտրոնում»:
2022 թվականի փետրվարի 24-ին ՀՀ ոստիկանության Երեւան քաղաքի վարչության Մալաթիայի բաժնի ավագ հ/քննիչ Արթուր Իսկանդարյանի որոշմամբ Ջամիլա Ուսուբյանը ճանաչվել է տուժող: Գ. Մ.-ին մեղադրանք է առաջադրվել այն բանի համար, որ նա 2022 թվականի փետրվարի 14-ին Անդրանիկի 74-րդ շենքի 9-րդ հարկում, շենքի 1-ին հարկի շքամուտքից լսել է կնոջ եւ նույն տուժողի՝ Ջամիլա Ուսուբյանի միջեւ տեղի ունեցող վիճաբանության ձայները՝ պայմանավորված բարձրախոսի գողության շուրջ նախորդ օրը տեղի ունեցած խոսակցության հետ: Ըստ դատարան ուղարկված գործի նյութերի, պարզաբանումներ կատարելու նպատակով Գ.Մ.-ն վերելակով ցանկացել է իջնել առաջին հարկ, սակայն ընթացքում վերելակը կանգ է առել եւ վերելակ է մտել նաեւ տուժողի ամուսինը՝ Գրիգոր Գյուլփանոսյանը, երրորդ խմբի հաշմանդամություն ունեցող, ձեռնափայտերով քայլող: Հարեւանը ձեռքերով սեղմել է Գրիգորի պարանոցն ու բռունցքով 3-4 հարված հասցրել նրա գլխի շրջանին՝ պատճաոելով «առողջությանը թեթեւ վնասի հատկանիշներ չպարունակող՝ գլխի ձախից հետնա-ճակատային շրջանի քերծվածքի ձեւով արտահայտված մարմնական վնասվածք»: Նա խոհանոցային դանակն ուղղելով Ջ. Ուսուբյանի ուղղությամբ՝ վերջինիս հասցեին հնչեցրել է սպանության սպառնալիքներ, հայհոյանքներ: Տուժողը մտել է տնօրենի աշխատասենյակ եւ փակելով մուտքի դուռը՝ ահագանգել է ոստիկանություն: Ի դեպ, մեր ձեռքի տակ գտնվող ավագ փորձագետ Վ. Ոսկանյանի եզրակացության համաձայն, փորձաքննության ներկայացված գործարանային եղանակով պատրաստված խոհանոցային «դանակը սառը զենք չի հանդիսանում»:
Այս տարվա մայիսի 16-ին Երեւան քաղաքի քրեական դատարանի դատավոր (Շենգավիթի նստավայր) Սամվել Յուզբաշյանը ստանձնել էր քրեական գործի վարույթը:
Կարդացեք նաև
Մայիսի 29-ին դատարանը հեռացել էր դատավճիռ կայացնելու, իսկ քանի որ տուժող կողմը վիճաբանության մեջ էր հայտնվել, նրանք գնացել են տուն, չիմանալով, որ դատարանը, ըստ «Առավոտի» տեղեկությունների, կարճել է գործը, վաղեմության ժամկետ կիրառելու հիմքով:
Ուշադրության արժանի է այն, որ գործով կողմերը չունեին փաստաբան, ներկայացուցիչներ, իսկ որ երկու տարի առաջ դատարան ուղարկված գործով անդրանիկ նիստը տեղի ունեցավ օրերս…
Ռուզան ՄԻՆԱՍՅԱՆ
«Առավոտ» օրաթերթ
04.06.2024
