Հասարակական գործիչ Էդգար Ղազարյանը պատասխանելով Aravot.am-ի դիտարկմանը, թե իշխանությունը եւ նրա քարոզիչները պնդում են, իբր Սրբազան պայքարը գնալով մարում է եւ քաղաքացիներին դրամով են շահագրգռում մասնակցել բողոքի խաղաղ անհնազանդության գործողություններին, մինչդեռ Բագրատ սրբազանը միանգամայն հակառակն է ապացուցում՝ մարդկանց հորդորելով զուտ դիտորդի կարգավիճակով չգալ ու չմասնակցել հանրահավաքներին, հանրային հանդիպում-քննարկումներին, ասաց. «Սրբազանի ասածը վերաբերում է նրան, որ սա սովորական պայքար չէ, հետաքրքիր տեսակետներ լսելու համար հանրահավաքներ չեն։ Սա պայքար է, որին պետք է մասնակից լինեն պայքարի, որոշակի գործողությունների պատրաստ մարդիկ։ Իսկ իշխանական տեսակետները, որ իբր մարդիկ այս հավաքներին մասնակցում են գումարի դիմաց, ընդամենը ցնդաբանություն է, որը հնչեցրել են երկու պատգամավորներ՝ Հովիկ Աղազարյանը եւ Վահագն Ալեքսանյանը։ Վահագն Ալեքսանյանը նույնիսկ գումար էր նշել, որ 3000 դրամի դիմաց են գալիս։
Քանի որ հավաքին գումարի դիմաց մասնակից դարձնելը հանցագործություն է, Վահագն Ալեքսանյանը, եթե նման տեղեկություն ունի, պետք է դիմեր իրավապահ մարմիններին, վարույթ նախաձեռներ եւ ապացուցեր դա։ Հակառակ դեպքում ստացվում է, որ ինքը վիրավորում է այն տասնյակ հազարավոր քաղաքացիներին, այդ թվում ինձ, ովքեր իրենց գիտակցված կամքով, սեփական որոշմամբ, այդ հավաքների գաղափարական խորհուրդը հասկանալով գնացել են մասնակցելու։
Գուցե Վահագն Ալեքսանյանին ինչ-որ մի բան անելու համար անհրաժեշտ է 3000 դրամից մինչեւ մի քանի միլիոն դրամի փոխհատուցում, որից ինքը ստանում է։ Օրինակ, որպես ԱԺ պատգամավոր, չունենալով պատգամավոր լինելու որեւէ անձնական, քաղաքական, մասնագիտական կամ այլ հատկանիշ։ Ըստ իր հայտարարագրերի, լինելով պատգամավոր, ստանում է ամսական մոտ մեկ միլիոն դրամի չափ գումար այդ զազրախոսությունները դուրս տալու համար։ Եվ իր ընկալումների մեջ, գուցե, պատկերացնում է, որ եթե ուրիշ մեկն էլ գնում է հավաքի, դրա համար պետք է անպայման ֆինանսական փոխհատուցում ստանա։
Այս մարդիկ գաղափարական էություն, հայրենասիրություն, ընդհանուր պատկերացումներ հայրենիքի վերաբերյալ չունեն ու չեն պատկերացնում։
Կարդացեք նաև
Իսկ Բագրատ սրբազանի մոտեցումները եւ իրեն շրջապատող տասնյակ ու հարյուր հազարավոր մարդկանց մոտեցումները չափազանց ազնիվ են եւ հայրենանվեր»։
Աշոտ ՀԱԿՈԲՅԱՆ
