«Գնել Պետրոսյանը կալանավորվեց 1 ամիս ժամկետով: Տեսանյութերը ցույց չէին տալիս, կալանավորվեց ոստիկանի ցուցմունքի հիման վրա: մենք բոլորս տեսել ենք, որ կան մարդիկ, որոնց ոստիկանները հարվածել են, դեմքի վրայով քայլել են եւ այլ այլանդակություններ, այս պահի դրությամբ որեւէ մեկը կալանավորված, ձերբակալված չի: Կալանավորված է անձ, որը ըստ Քննչականի, հարվածել է ոտքով ոստիկանական վահանին, սա է, ուրիշ ոչ մի բան չկա»,- այսօր սուրբ Աննա եկեղեցու բակում «Տավուշը հանուն հայրենիքի» շարժման հավաքին ասաց իրավապաշտպան Ռուբեն Մելիքյանը:
Նա հեգնեց, որ Սահմանադրությամբ մարդը բարձրագույն արժեք է, բայց պարզվում է, իրականում ոստիկանական վահանն է բարձրագույն արժեք. «Մարդուն հարվածելը՝ ոչ մի բան, ոստիկանի վահանին հարվածելը՝ կալանք»:
Նա ասաց, որ ցուցարարներից 5 հոգու ձերբակալել են, բայց զանգվածային անկարգության մեղադրանքը հանել են խուլիգանության հոդված են դրել:
Մելիքյանը զգուշացրեց ցուցարարներին չանել այնպիսի գործողություններ, որով վտանգի տակ կդնեն իրենց. «Ձերբակալված Մեսրոպ Եսայանին անդրադառնամ, այսօր առավոտյան նրա 3-րդ բալիկն է ծնվել, կալանքի միջնորդություն է դատարան հասցեագրվել: Օրենքը կարեւոր է, բայց շատ ավելի կարեւոր է հանրային բարոյականությունը, առանց հանրային բարոյականության, օրենքը անալի է, աղ չկա մեջը: Այն պայմաններում, երբ գլուխ ջարդած ոստիկանները կալանավորված չեն, վահանին խփող կամ շշեր նետող մարդկանց կալանավորումը բացարձակ անարդարացի է՝ միաժամանակ հասկանալով, որ չի կարելի նման բան անել, ինչ-որ բան նետել ու առիթ տալ, որ մարդիկ ասեն՝ տեսնո՞ւմ եք, նման բաներ են արել»:
Կարդացեք նաև
Հռիփսիմե ՋԵԲԵՋՅԱՆ
Հ. Գ. Ավելի ուշ հայտնի դարձավ, որ Մեսրոպ Եսայանը բանտային կալանքի չի ենթարկվի։ Նրա նկատմամբ կիրառվել է «տնային կալանք» խափանման միջոց։
