ՀՀ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի հերթական նիստի ժամանակ քննարկվեց Գրադարանների եւ գրադարանային գործի մասին օրենքում լրացումներ եւ փոփոխություններ կատարելու մասին օրենքի նախագիծը:
Հիմնական զեկուցող՝ ԿԳՄՍ նախարարի տեղակալ Ալֆրեդ Քոչարյանը նշեց, որ նախագծով ամրագրվում են մի շարք հարցեր, մասնավորապես արտասահմանյան կարեւոր գրադարանների հայագիտական ֆոնդի համալրման պահանջը, ինչը հնարավորություն է տալիս այդ հաստատությունները համալրել հայկական գրքերով:
Փոխնախարարն ասաց, որ ի թիվս այլնի՝ հստակեցվում են նաեւ գրադարանների օգտագործման նպատակները, տեսակը, գրադարանի տարածքի օգտագործումը տնտեսական նպատակներով, սակայն այդ ամենը պետք է իրականացվի միայն լիազոր մարմնի համաձայնեցմամբ, նաեւ պետք է չհակասի գրադարանի հիմնական գործունեությանը:
Կարդացեք նաև
Ալֆրեդ Քոչարյանը ասաց նաեւ, որ օրենքով հաստատվելու է պետական գրադարանների աշխատողների ատեստավորման կարգը, ինչի արդյունքում կվերանայվեն աշխատավարձերը: Հավելեց, որ նախագծի ընդունման դեպքում գրադարանները կարող են դառնալ ոչ ֆորմալ կրթության եւ ժամանցի ապահովման վայրեր:
Ինչ վերաբերվում է գրադարանների տնտեսական նպատակներով օգտագործմանը, այս մասին էլ նշեց, որ «Համաշխարհային տենդենց կա, որ բացի գրադարանային բուն ծառայություններից՝ հավելյալ ծառայություններ են մատուցվում, որն էլ հավելյալ եկամուտներ է գեներացնում գրադարանների համար»:
ՔՊ-ական պատգամավոր Հակոբ Ասլանյանին հետաքրքրում էր, որ եթե թվայնացվում են գրադարաններում պահպանվող բացառիկ գրքերը, ի՞նչ են արվում դրանց բնագրերը, օրինակ, եթե թվայնացվի 1512թ Ուրբաթագիրքը, բնագիրն ի՞նչ է լինելու, ինչ պաշտպանություն է նախատեսվելու նման գրքերի համար:
Փոխնախարարն ասաց, որ այս պահին թվայնացման մասին չէ, թվայնացումը վաղուց է արվում, ու անկախ թվայնացումից՝ գրադարանները, մասնավորապես ազգային գրադարանը ունի տարբեր սրահներ՝ համապատասխան պահպանության պայմաններով, որտեղ պահվում են նման գրքերը:
«Օրինակ, ես ունեմ 1830թ Լազարյան ճեմարանի հրատարակած գիրք, Մատենադարանում էլ չկա, անտիկվարիատ է, ուզում եմ տալ թվայնացնեն, բայց բնագիրն ուզում եմ իմ գրադարանում պահել: Տանը 3000 կտոր գիրք ունեմ, իմ տանն այդպիսի անտիկվար գրքեր ունեմ»:
Ալֆրեդ Քոչարյանը պատասխանեց, որ կարող է կազմակերպել պատգամավորի եւ Ազգային գրադարանի մասնագետների հետ հանդիպումը, գիրքը թվայնացնեն ու բնագիրը վերադարձնեն Հակոբ Ասլանյանին:
Գոհար ՀԱԿՈԲՅԱՆ
