Ադրբեջանի նախաձեռնությամբ մայիսի 24-ին Վարշավայում բացվել է «Քրիստոնեական ժառանգությունը Ադրբեջանի բազմամշակութային ինքնատիպության մեջ» խորագրով ցուցահանդեսը։ Ցուցահանդեսի բացման արարողությանը ներկա է եղել Ադրբեջանից ժամանած մեծ պատվիրակություն։ Ցուցահանդեսի բացմանը ներկա են եղել նաև Հռոմեակաթոլիկ եկեղեցու բարձրաստիճան այրեր և Լեհաստանի խորհրդարանի մեկ պատգամավոր։
Ցուցահանդեսին մեծամասամբ ներկայացվել է Արցախի հայկական հոգևոր ժառանգությունը՝ այն մատուցելով որպես աղվանական։
Այս ցուցահանդեսը լայնորեն լուսաբանվել է ադրբեջանական մամուլում։
Ցուցահանդեսի կազմակերպման գործում, Aravot.am-ի տեղեկություններով, մեծապես աջակցել են Վարշավայի կարդինալի օգնական եպիսկոպոս Միխալ Յանոխան, որն ի պաշտոնե ներկայացնում է Վարշավայի կարդինալին և Հայր Ալեքսանդր Սենյուկը։ Վերջինս Լեհահայոց մշակույթի և ժառանգության հիմնադրամի խորհրդի անդամ է։ Լեհաստանում Ադրբեջանի դեսպանն իր շնորհակալական խոսքում է այս մասին վկայել՝ իր դրվատանքը հայտնելով Հայր Ալեքսանդր Սենյուկին։ Հայր Ալեքսանդր Սենյուկը նաև ցուցահանդեսի համար տրամադրել է կաթոլիկ եկեղեցու առջևի տարածքը։
Կարդացեք նաև
Լեհահայոց մշակույթի և ժառանգության հիմնադրամի հիմնադիրը Կարդինալ Կազիմիր Նիչն է, նա Վարշավայի ներկայիս մետրոպոլիտն է, միաժամանակ նաև Լեհաստանի Հայ կաթոլիկների առաջնորդը։
Ի դեպ, մոտ ութ տարի առաջ Միխալ եպս․ Յանոխան մի խումբ լեհ հոգևորականների հետ եղել է Արցախում, այցելել սրբավայրեր և մասնակցել պատարագների։
Նելլի ԳՐԻԳՈՐՅԱՆ
