«Խոջալուի մասին խոսում են Ալիեւը, ՀՅԴ-ն եւ ՀԱԿ-ը»,- խորհրդարանում, «ՀՀ 2023 թվականի պետական բյուջեի կատարման մասին» տարեկան հաշվետվության քննարկման ժամանակ հայտարարեց ՔՊ-ական պատգամավոր Ծովինար Վարդանյանը՝ նկատելով, որ այս պայմաններում Ալիեւն էլ կարիք չունի ՀՀ-ի դեմ այլ հիբրիդային պատերազմ վարելու, ՀԱԿ-ն ու ՀՅԴ-ն «Ալիեւի խոսափողերն են»։ ԱԳ նախարար Արարատ Միրզոյանը համամիտ է իր կուսակցի հետ։
Ծովինար Վարդանյանը հակադարձեց Արթուր Խաչատրյանի դժգոհությանը՝ ԵՄ առաքելության մասով․ «Որովհետեւ, ես չտեսա, որ նման ջանասիրաբար ելույթներ ունենայիք ՌԴ անգործության վերաբերյալ»։ Ծովինար Վարդանյանն ընդդիմադիր պատգամավորին հորդորեց՝ չզարմանալ, երբ իր եւ իր կուսակցության նարատիվները նույնացնում են որեւէ պետության, կայսրության նարատիվների հետ։
Մանրամասները՝ տեսանյութում
Ծովինար Վարդանյանի գնահատմամբ՝ ակնհայտ է, որ Հայաստանը վերջապես ունի դիվանագիտություն, կցորդ չէ։ Նա ՀՀ դիվանագիտության հաղթանակ համարեց այն, որ Ադրբեջանի հետ երկխոսությամբ սահմանազատման հարցեր են լուծվում եւ զինվորների վրա չեն շպրտվում դիվանագետների չարած գործերը։
ԵՄ առաքելությանը Հայաստան հրավիրելու մասով ընդդիմադիր պատգամավորի առարկություններին ԱԳ նախարար Արարատ Միրզոյանը պատասխանել էր՝ ԵՄ առաքելության տեղակայումից հետո որևէ մեծ հարձակում, ներխուժում Հայաստանի ինքնիշխան տարածք չի եղել․ «Այն վիճակը, այն ծուղակը, որում հայտնվել է Հայաստանը, մի ծուղակ է, որը դուք կամ ձեր օգնությամբ ուրիշներն այդ թակարդը լարել եք տասնամյակներ շարունակ։ Այո, դա եղել է շատ քաղցր, բայց, այնուամենայնիվ, շղթա՝ ապահովելու Հայաստանի իրական անազատությունը»։
Ըստ ԱԳ նախարարի՝ այն դիրքորոշումները, որ հայտնվել են տարիներով, միջոց են եղել՝ կանխելու Հայաստանի իրական ինքնիշխանությունը, սուվերենությունն ու անկախությունը։
Նելլի ԳՐԻԳՈՐՅԱՆ
