«Երեկ նորոգած դուռը հաջորդ օրը ճաքում է, պատուհանը տեղադրում են՝ համապատասխան հարդարանքը չկա, լվացարաններն այսօր տեղադրում են՝ վաղը փչացած է եւ այսպես՝ ամիսներ շարունակ։ ԱԺ ընդդիմադիր խմբակցություններին տրամադրված հատվածում նորոգում էր տեղի ունենում՝ գցված գորգերի պայմաններում»,- այս ամենն այսօր ԱԺ պետական-իրավական ու ֆինանսավարկային եւ բյուջետային հարցերի մշտական հանձնաժողովների համատեղ նիստում, 2023 թվականի բյուջեի կատարողականի քննարկումների ժամանակ, ՀՀ ԱԺ աշխատակազմի ղեկավար-գլխավոր քարտուղար Դավիթ Առաքելյանին ասաց «Հայաստան» խմբակցության պատգամավոր Լիլիթ Գալստյանը։
Ընդդիմադիր պատգամավորն ասաց՝ տեսնում է բարեփոխելու ճիգը, բայց զուգահեռ տեսնում է նաեւ չհամակարգված, չափորոշիչներին չհամապատասխանող աշխատանք եւ հորդորեց՝ հետեւել աշխատանքներին։ Նա նաեւ ասաց, որ աշխատակազմին խնդրել է՝ հանձնաժողովի նիստերի դահլիճում աթոռների փոշիները մաքրեն, որովհետեւ «ամիսների փոշի կա»։
Դավիթ Առաքելյանն արձագանքեց՝ անձամբ է հետեւողական լինում կատարվող աշխատանքներին, որքան հասցնում է, բայց մեղավորը մրցույթում շահած կազմակերպությունն է, որը տալիս է եզրակացություն, որ աշխատանքներն ավարտվել են եւ լավ, իսկ ԱԺ աշխատակազմը չի կարող չընդունել այդ եզրակացությունը։
Աթոռների փոշիների մասով Վլադիմիր Վարդանյանը հումոր արեց՝ «մեր հանձնաժողովը նիստեր հաճախ է անում, աթոռներին փոշի չի լինում՝ չի հասցնում նստել»։
Կարդացեք նաև
Մանրամասները՝ տեսանյութում
ԱԺ շենքի վերանորոգման աշխատանքներ՝ նախատեսված են եղել 107 միլիոնի, իրականացվել է 70-ի։ Նախագծից 30 տոկոսի շեղումը, Դավիթ Առաքելյանի փոխանցմամբ, պայմանավորված է նախատեսված ինչ-ինչ աշխատանքների հետաձգումով․ այդ թվում նաեւ՝ ԱԺ բակի վերանորոգման։ Առաջիկայում ԱԺ ամբողջ բակի ոռոգման ցանցի վերակառուցում կանցկացվի․ԱԺ այգին ոռոգվում է խմելու ջրով։
ՔՊ-ական պատգամավոր Սերգեյ Բագրատյանին նաեւ իր աշխատասենյակի ինտերներտ կապի հարցն էր հուզում․ լավը չէ։ Դավիթ Առաքելյանը վստահեցրեց՝ հաղթող կազմակերպությունը վերազինման աշխատանքներ է սկսելու առաջիկայում, ամեն ինչ կկարգավորվի։
Վլադիմիր Վարդանյանին հուզում էր ԱԺ աշխատակազմում աշխատանքը գրավիչ դարձնելը․ կադրերի «հոսունություն» կա, բայցի այդ՝ մասնագիտական որակների հարցին են անընդհատ բախվում։
Մանրամասները՝ տեսանյութում
2023-ին ԱԺ բյուջեն կազմել է 7,067,172,500 դրամ, ծախսվել է՝ 6,944,533,100 դրամ։
Նելլի ԳՐԻԳՈՐՅԱՆ
