Երևանի ընդհանուր իրավասության քրեական դատարանը՝ դատավոր Հարություն Մանուկյանի նախագահությամբ, այսօր հրապարակեց Ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով վճիռը, համաձայն որի՝ Երանոսյանին առաջադրված մեղադրանքը վերաորակվեց, նրա նկատմամբ կիրառվեց համաներում։
Դատարանը որոշեց 309-րդ հոդվածի 1-ին մասով (Պաշտոնեական լիազորություններն անցնելը) Երանոսյանին առաջադրված մեղադրանքը վերաորակել եւ նրան մեղավոր ճանաչել 375-րդ հոդվածի (Իշխանությունը չարաշահելը, իշխանազանցությունը կամ իշխանության անգործությունը) առաջին մասով նախատեսված հանցագործություն կատարելու համար և այդ մասով նրա նկատմամբ քրեական հետապնդումը դադարեցնել՝ վաղեմության ժամկետն անցած լինելու հիմքով։
Իսկ Քրեական օրենսգրքի 309 հոդվածի 2-րդ մասով առաջադրված մեղադրանքը վերաորակվեց 375-րդ հոդվածի 2-րդ մասով նախատեսված հանցագործության հատկանիշներով եւ Երանոսյանի նկատմամբ պատիժ նշանակվեց ազատազրկում՝ 4 տարի ժամկետով, ապա այդ մասով կիրառվեց համաներում։
Երանոսյանի պաշտպան Տիգրան Սաֆարյանը Aravot.am-ին ասաց, որ այս պահին չի շտապի գնահատական տալ դատարանի որոշմանը, հրապարակված վճռին, քանի դեռ չեն ստացել որոշումն ամբողջությամբ ու քանի դեռ չի ծանոթացել որոշման նկարագրությանը: Միայն հավելեց, որ այլ որոշում էին ակնկալում՝ արդարացման որոշում:
Կարդացեք նաև
Հիշեցնենք, որ Լեւոն Երանոսյանը մեղադրվում էր 2018-ի հեղափոխության օրերին ոստիկանության կողմից հատուկ միջոցներ կիրառելու ժամանակ պաշտոնեական լիազորություններն անցնելու մեջ։ Լեւոն Երանոսյանին մեղադրանք է առաջադրվել այն բանի համար, որ նա հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։
Արփինե ՍԻՄՈՆՅԱՆ
