Այսօր իրավապաշտպան Ռուբեն Մելիքյանն ու իր մի քանի գործընկերներ խորհրդանշական ակցիա են իրականցրել Հանրապետության փողոցում: Նրանք սահմանազատել են մայիսի 27-ին նշված վայրում ոստիկանների իրականացրած անօրինական գործողությունների վայրը եւ առանձնահատուկ կերպով քաղաքացիներին են ներկայացրել, թե որ հատվածում ոստիկաններն իրենց ինչ անօրինական գործողություն են թույլ տվել: Հիշեցնենք, որ նշված վայրում ոստիկանները դաժան ծեծի էին ենթարկել ԱԺ պատգամավոր Աշոտ Սիմոնյանին:
«Այստեղ սեռական հայհոյանքներ են տվել, երեք հարկանի, այս հատվածում ոստիկանական բռնություններ են կատարվել, այստեղ քողարկված հարվածներ, բիզերով հարվածներ, վեց օր անգործություն է այստեղ արձանագրվել, տեղեկատվություն կա, որ հանցադեպի կրկնության դեպքեր են արձանագրվել Վազգեն Սարգսյան հասցեում նախարարությունների դալանի հատվածում»,- այսպես դեպքի վայրը սահմանազատելուց հետո իրավապաշտպանները կազմեցին դեպքի արձանագրությունը՝ թվարկելով՝ որ հատվածում, ինչ են թույլ տվել ոստիկանները:
Ռուբեն Մելիքյանն էլ շարունակեց. «Անպարկեշտ արտահայտություններ փնտրեք, այստեղ կա՞ն, թե՞ չկան, օպերատիվ տեղեկությունների համաձայն՝ կան: Ոստիկանական պատիվն էլ փնտրենք, տղամարդու պատիվ փորձենք գտնել»:
Ապա Մելիքյանը անդրադարձավ մայիսի 31-ին ԱԳՆ-ի դիմաց ոստիկանների եւ «Տավուշը հանուն հայրենիքի» շարժման մասնակիցների միջեւ արձանագրված միջադեպին ու նկատեց, որ այդ դեպքով քննչական խումբ է ձեւավորվել, քննչական գործողություններ են կատարվել, մարդիկ են ձերբակալվել, իսկ Հանրապետության փողոցում տեղի ունեցած դեպքով, որտեղ պատգամավորի են ծեծել, 6 օր է՝ ոչ մի գործողություն չի կատարվել: Իրավապաշտպանն այս դեպքով արձանագրեց երկակի ստանդարտների իրողությունը:
Կարդացեք նաև
Արփինե ՍԻՄՈՆՅԱՆ
