«Հաշվի առնելով այն հանգամանքը, որ ՀՀ դե ֆակտո իշխանության աջակցության մասին պատրաստակամության և աջակցության կոչերը հնչում են Թուրքիայից ու Ադրբեջանից պարբերաբար՝ հատկապես վերջին օրերին՝ ինչքան ծանր թափ է առնում շարժումը, կարող ենք ասել՝ սա որոշակի քաղաքական գիտակցության արդյունք է»,- Սուրբ Աննա եկեղեցու բակում լրագրողների հետ զրույցում հայտարարեց թյուրքագետ Վարուժան Գեղամյանը։
Ինչպես արդեն տեղեկացրել ենք, Սուրբ Աննա եկեղեցուց շարժման մասնակիցները երթով այս պահին ընթանում են Մաշտոցի պողոտայով։
Վարուժան Գեղամյանը նշեց՝ Թուրքիայում ու Ադրբեջանում՝ երկու երկրներում էլ կա ընկալում, որ եթե ՀՀ-ում լինի իշխանափոխություն, և իշխանությունը նորից վերադառնա ազգային ուժերի ձեռքը, ապա այս պարագայում խնդիր է լինելու տարածաշրջանում իրենց շահերը սպասարկելու համար․ «Այսինքն՝ Թուրքիան ու Ադրբեջանը զրկվելու են այն հնարավորությունից, որն այս պահին կա իրենց համար, քանի որ չկա հայկական կողմի դիմադրություն։ Այդ հնարավորությունը թույլ է տալիս Թուրքիային ու Ադրբեջանին տարածաշրջանում դառնալ գերակա ուժ։ Տեսնում ենք այն մտավախությունը, որ իշխանափոխությամբ սա կարող է ավարտվել»։
Կարդացեք նաև
Ըստ նրա՝ ընդհանրապես, եթե ՀՀ-ի քաղաքական իրադարձություններին բացասական են արձագանքում Թուրքիան ու Ադրբեջանը և ասում են՝ մենք ամեն գնով պետք է աջակցենք իշխանությանը, դժվար է չհամաձայնել, որ, բնականաբար, դա Թուրքիայի դեմ է և նպաստում է ՀՀ-ի շահերի սպասարկմանը։
Տաթև ՀԱՐՈՒԹՅՈՒՆՅԱՆ
