Այսօր Վրաստանի խորհրդարանը կարողացավ ձայների մեծամասնությամբ հաղթահարել նախագահ Սալոմե Զուրաբիշվիլու վետոն, որը նա դրել էր «Օտարերկրյա ազդեցության թափանցիկության մասին» օրենքի ընդունման վրա: Մոտ օրերս այդ օրենքը կրկին ուղարկվելու է նախագահի ստորագրմանը, բայց այս անգամ նախագահի մերժումից հետո օրենքը կարող է ստորագրել խորհրդարանի նախագահը, որից հետո արդեն օրենքը ուժի մեջ կմտնի։
Այս մասին հաղորդում է BBC-ն:
Հիշեցնենք, որ այս օրենքը, որն ավելի հայտնի է որպես «օտարերկրյա գործակալների մասին» օրենք, ընդունվում էր Թբիլիսիում բազմահազարանոց ցույցերի ֆոնին, վրաց հանրությունը, որը տարիներ շարունակ իրեն համարել է Եվրոպայի, Արեւմուտքի մաս՝ խիստ դժգոհություններ էր հայտնում այս օրենքի ընդունման կապակցությամբ, համարելով, որ այն պարտադրված է Ռուսաստանից: Օրենքի ընդունումը դատապարտել են ԵՄ-ն, ԱՄՆ-ն:
Վետոն չեղարկելու համար հարկավոր էր պառլամենտի 150 պատգամավորներից 76-ի ձայնը: Կողմ քվեարկեց 84 պատգամավոր՝ մեծամասնությունը իշխող «Վրացական երազանք» կուսակցությունից:
Կարդացեք նաև
Ընդդիմադիր պատգամավորները դժգոհում են, որ վրացական իշխանություններն այս քայլով փակում են ԵՄ ճանապարհը Վրաստանի առաջ, եւ առաջիկայում գուցե Վրաստանի հանդեպ ԵՄ-ն սանկցիներ կիրառի:
