Անկախ պետականությունը յուրաքանչյուր ազգի համար արժանապատվության ու ազգային մշտամնա արժեքների պահպանման գրավականն է։ Իր բազմադարյա պատմության ընթացքում հայ ժողովուրդը կերտել է հզոր պետականություն, բայց նաև ճաշակել է պետականության կորստի չափազանց ծանր իրականությունը։
Ցավոք, մեր հայրենիքի անբարենպաստ ու վտանգաշատ աշխարհագրական դիրքը շարունակաբար ստեղծել է գոյաբանական բազմաբնույթ խնդիրներ ու սպառնալիքներ։ Ու հակառակ այդ իրողությունների, փյունիկի պես հառնել ենք մենք ամեն անգամ ու ի հեճուկս մեր լիակատար կործանումն ու անհետացումը երազող ոսոխների` հաղթանակել է Հայ ժողովրդի անկոտրում կամքն ու վերապրելու աննկարագրելի վճռակամությունը։ 1918 թվականի մայիսի 28-ին յոթը դարերի խավարից հետո նորից առկայծեց ու պետականակերտության լույսերի մեջ շողշողաց հինավուրց ու առասպելական Երկիր Նայիրին։
Որպես Սարդարապատի, Բաշ-Ապարանի ու Ղարաքիլիսայի հերոսամարտերով կերտված անկախ պետականության ժառանգորդներ, այսօր մեր սրբազան պարտքն է պաշտպանել այն արտաքին և ներքին բոլոր սպառնալիքներից ու հաջորդող սերունդներին փոխանցել ազատ, անկախ, ժողովրդավար ու բարգավաճող Հայաստան։
ՍԴՀԿ
