«Չգիտեմ էլ՝ ինքը գալո՞ւ է, թե՝ ոչ։ Մենք գնում ենք Սարդարապատ` ավանդական նշելու մայիսի 28-ը, ինչպես սեպտեմբերի 21-ին, ինչպես Մուսա լեռան օրը»,- լրագրողների հետ զրույցում ասաց «Տավուշը հանուն հայրենիքի» շարժման առաջնորդ Բագրատ Սրբազանը` պատասխանելով հարցին՝ եթե ՀՀ վարչապետ Նիկոլ Փաշինյանը մայիսի 28-ին գնա Սարդարապատ, իրենք գործողությունների դիմելո՞ւ են։
Հարցին՝ եթե Նիկոլ Փաշինյանը մուտք գործի Սարդարապատի հուշահամալիր, ի՞նչ են անելու, Բագրատ Սրբազանը պատասխանեց․ «Թող փորձի»։ Լրագրողները հետաքրքրվեցին՝ իրավապահների արձագանքն ինչպիսի՞ն կլինի, Սրբազանն ասաց․ «Դրանք իրավապահներ չեն, ոստիկաններ են»։
Հստակեցմանը՝ եթե հաջողեք և վարչապետ դառնաք, իրավական մասով ինչպե՞ս եք լուծելու խնդիրը, Բագրատ Սրբազանը պատասխանեց՝ դա ոտքի վրա պատասխանելու հարց չէ։
Լրագրողները հիշեցրին, որ շարժման կողքին եղել են մարդիկ, որոնք սկզբում եղել են, բայց հետո չեն երևացել՝ օրինակ՝ Արման Թաթոյանը, Բագրատ Սրբազանն արձագանքեց․ «Արման Թաթոյանն իմ եղբայրն է հարազատ, շարժման սկզբից էլ, վերջից էլ միշտ էլ ներկա է»։ Հարցին՝ վարչապետ դառնալու համար ինչպե՞ս է հաղթահարելու երկքաղաքացիության հետ կապված՝ սահմանադրական արգելքը, Բագրատ Սրբազանը պատասխանեց․ «Հիմա դա ինչո՞վ է առնչվում Սարդարապատ գնալուն»։ Լրագրողի դիտարկմանը՝ ամենակարևոր հարցերից է, Սրբազանն այսպես արձագանքեց․ «Ամենակարևոր հարցն այս մարդու հեռացումն է, որը տեղի է ունենալու․ մնացածն ածանցյալ է։ Հեռացումից հետո լինելու է շատ լավ գործ»։
Կարդացեք նաև
Այն, որ ոստիկանապետը հայտարարել է, թե Բագրատ Սրբազանը հայհոյում է ոստիկաններին, նա այսպես արձագանքեց․ «Ձայնագրություն կա, թող նայեն, տեսնեն։ Եթե ոստիկանապետ կոչվածը կարող է ցուցարարին լակոտ անվանել, ուրեմն իրեն ինչ ասես հասնում է ասել»։ Լրագրողները հիշեցրին, որ ոստիկանապետը Բագրատ Սրբազանին Տեր Հայր է ասում, Բագրատ Սրբազանն էլ նշեց․ «Ես էլ իրեն ենթասպա եմ ասում»։
Բագրատ Սրբազանը չպատասխանեց հարցին, թե Սարդարապատից հետո ինչ գործողությունների են դիմելու ու նշեց․ «Մենք դեռ որևէ գործողության մասին չասած հատորներով ոստիկաններ են ուղարկում»։ Բագրատ Սրբազանը չբացառեց, որ Նիկոլ Փաշինյանը հնարավոր է՝ որպես վարչապետ վերջին անգամ է այցելում Սարդարապատ։
Անդրադառնալով այսօրվա՝ ոստիկանների գործողություններին՝ նա ասաց․ «Ոստիկաններն այլանդակ վարք են դրսևորել՝ մանավանդ մի քանի դրվագով․ երեսուն հոգով մարդ են ծեծել, ազդանշան տալու համար տղայի գլուխը ջարդել են։ Լսել եմ, որ հատուկ ջոկատայիններ, հատուկ զորքեր են, նրանց սովորական ոստիկանական համազգեստ են հագցնում, միևնույն ժամանակ էլ շաբաթը 40 հազար դրամ պարգևատրություն են վճարում։ Ինչքան վախի ամպլիտուդը բարձրանում է, այնքան վայրագ են դառնում»։ Լրագրողները նաև հետաքրքրվեցին՝ Ձեր Լեքսուսը շա՞տ է վնասվել, Բագրատ Սրբազանը պատասխանեց՝ 30․000-ի վնաս է եղել ու նշեց․ «Հիմա գիտեք չէ՞՝ գրում են գոլդ համարներով․ ոչ ես եմ առել, ոչ էլ գիտեմ»։ Լրագրողներից մեկն էլ կես կատակ-կես լուրջ ասաց՝ լավ է մեքենայի համարները 6-երով չեն եղել, Բագրատ Սրբազանն այս առիթով արձագանքեց․ «Կարող է այդ ժամանակ շատ հարազատ լիներ իրենց»։
Տաթև ՀԱՐՈՒԹՅՈՒՆՅԱՆ
