Ակսել Բակունց, Ավետիք Իսահակյան, Մանուկ Աբեղյան… մեծանուն հայերի ցանկը թերեւս կարելի է անվերջ թվարկել, երբ սերտում ենք Էջմիածնի Գեւորգյան ճեմարանի պատմությունը: Այստեղ են նրանք կրթվել, հետո կրթել սերունդներ: Աստվածաբանական այս համալսարանի՝ ավելի քան մեկդարյա գործունեության շնորհիվ է Հայաստանում ծաղկել ու ծաղկում կրթական մշակույթը, մանկավարժությունն ու գիտությունը, եկեղեցին ու հոգևոր կյանքը:
«Ճեմարանի հիմնական գործառույթը, առաքելությունը՝ կերտել հայ եկեղեցու սպասավորներ, այս տեսլականը հստակ ձեւակերպված է եղել 1980-ականներից, երբ հայ եկեղեցու ամենալուսավոր կերպարներից մեկը՝ Մաղաքիա արքեպիսկոպոս Օրմանյանը՝ Կոստանդնուպոլսի պատրիարքը, առաջին անգամ Գեւորգյան հոգեւոր ճեմարանում դասավանդում է ու ժամանակի կաթողիկոսի խնդրանքով ձեւակերպում է նաեւ այս տեսլականը՝ պատրաստել հայ եկեղեցու համար ուսյալ եւ զարգացած եկեղեցականներ: Այսօր Գեւորգյան ճեմարանը ամենայն հայոց կաթողիկոս Գարեգին Բ-ի հստակ ուղղորդմամբ այս կարեւոր գործին է լծված»,- Aravot.am-ին ասաց ճեմարանի տեսուչ Շահե ծայրագույն վարդապետ Անանյանը:
Ճեմարան ընդունվելու տարիքային շեմը 18-22 տարեկանն է: Աստծո կանչն այստեղ է հավաքել ոչ միայն դպրոցը նոր ավարտած երիտասարդների, այլեւ արդեն բարձրագույն կրթություն ունեցողների՝ հրշեջից մինչեւ կինոռեժիսոր:
Գեւորգյան ճեմարանը սերտորեն համագործակցում է արտասահմանյան մի շարք աստվածաբանական համալսարանների ու հոգեւոր կենտրոնների հետ, Վարշավայի, Մոսկվայի, Նյու Յորքի աստվածաբանական համալսարանների հետ արդեն իսկ ստորագրված հուշագրերի ու համաձայնագրերի շնորհիվ տարիներ շարունակ կազմակերպվում է ուսանողների եւ գրականության փոխանակում, դասախոսությունների եւ համատեղ միջազգային գիտաժողովների կազմակերպում, դասախոսների փոխադարձ այցեր: Առաջիկայում Գեւորգյան ճեմարանը կքննարկի նաեւ Հալեի համալսարանի աստվածաբանական ֆակուլտետի հետ պայմանագրի ստորագրման հնարավորությունը:
Մանրամասն՝ տեսանյութում
Արփինե ՍԻՄՈՆՅԱՆ
