Այսօր վաղ առավոտից անհնազանդության ցույցեր են տեղի ունենում նաև Շիրակի մարզում։
Մեծ թվով քաղաքացիներ փակել են Գյումրի-Բավրա միջպետական ճանապարհի Թորոսի կամրջի հատվածը՝ պահանջելով վարչապետ Նիկոլ Փաշինյանի հրաժարականը։ «Հայ, Հայաստան, հայրենիք ու Աստված» բացականչում էին նրանք։
Ինչպես Aravot.am-ին տեղեկացրեց ՀՀԿ Գյումրու շրջանային խորհրդի նախագահ Արտյոմ Ղուկասյանը, ոստիկանները ուժ են կիրառել ցուցարարների հանդեպ՝ նրանց 70 տոկոսին բերման ենթարկելով Աշոցքի բաժին։ Ոստիկանները մեկ անգամ նախազգուշացրել են բացել ճանապարհը, մերժում ստանալուց հետո ցուցարարներին միանգամից բերման են ենթարկել։ Այս պահին ցույցն ակամա տեղափոխվում է ոստիկանության շենքի մոտ։
Կարդացեք նաև
Արտյոմ Ղուկասյանի փոխանցմամբ, իրենք գնում են բերման ենթարկված քաղաքացիների հետևից, 70 տոկոսը բերման է ենթարկվել։
ՀՀԿ խորհրդի անդամ, Գյումրու ավագանու անդամ Նարեկ Միրզոյանն էլ մեզ հետ զրույցում ասաց, որ ոստիկանության գործողությունը որևէ տրամաբանության մեջ չի տեղավորվում, քաղաքացիներին բերման ենթարկելու հիմք այդ պահին բացարձակապես չկար, խաղաղ ցույց էր, և որ մեկ անգամ նախազգուշացնելուց հետո ոստիկանությունը պարտավոր էր ողջամիտ ժամկետ տրամադրել ցուցարարներին ճանապարհը բացելու, որը չի արել։ Առանց նախազգուշացման, ուժ կիրառելով՝ նրանց բերման են ենթարկել Աշոցքի և Ամասիայի ոստիկանության բաժանմունքներ։
Նունե ԱՐԵՎՇԱՏՅԱՆ
