ԱԺ ճեպազրույցների ժամանակ «Պատիվ ունեմ» խմբակցության պատգամավոր Հայկ Մամիջանյանն անդրադարձավ ՔՊ խմբակցության պատգամավոր Խաչատուր Սուքիասյանի երեկվա ելույթին, որով նա սպառնաց ընդդիմությանը։
«Մինչեւ այսօր իրենք այդ ամենն անում էին առանց հայտարարելու՝ հետապնդում էին մարդկանց, ահաբեկում էին, ոստիկանության պաշտպանության ու վերահսկողության տակ գտնվող մարդուն մարմնական վնասվածքներ էին պատճառում։ Հիմա արդեն սկսել են հայտարարել։ Դե բարի ժամանց, կարող են ինձանից սկսել ունեզրկելը, սպանելը, բանտարկելը, մեզանից ոչ մեկը դրանից չի վախենում»,- ասաց նա։
Հայկ Մամիջանյանը հավելեց․ «Իրենք փորձում են պիտակավորել այս կամ այն քաղաքական, հասարակական գործիչներին, հայրենասերներին, մարդկանց, որոնք Հայաստանի ապագայի համար են պայքարում։ Իրենց փորձում են պիտակավորել, դարձնել ինչ-որ մեկի շահերի ներկայացուցիչ։ Հիմա ես փաստ եմ ասում՝ Թուրքիայի ղեկավարությունը՝ Էրդողանը բազմիցս հայտարարել է, որ կողմ է ՔՊ-ի՝ Հայաստանում իշխանության մնալուն։ Ալիեւն անցյալ տարի նոյեմբերին մեր Ստեփանակերտում հայտարարել է, որ պատերազմից հետո մի քանի անգամ հնարավորություն կար, որ հայրենասերները, ինքը «ռեւանշիստ» է համարում, գային իշխանության Հայաստանում։ Ու ասել է՝ դա մենք ամեն գնով կասեցրել ենք։ Հիմա մի կողմում Խաչատուր Սուքիասյանի խոսքն է, մյուս կողմում փաստեր՝ ՔՊ-ն սպասարկում է Թուրքիայի եւ Ադրբեջանի ղեկավարության շահերը։ Դե Սուքիասյանը թող իրենց շարքերում ման գա շահերի գործակալներին»։
Կարդացեք նաև
Ռոզա ՀՈՎՀԱՆՆԻՍՅԱՆ
