Երեւանի ընդհանուր իրավասության քրեական դատարանի Ավան եւ Նոր-Նորք նստավայրում՝ դատավոր Վահե Միսակյանի նախագահությամբ այսօր շարունակվեց «Դիզվառելիքի գործով» դատավարությունը: Հիշեցնենք, որ դատախազը պահանջել էր այս գործով մեղադրյալներին՝ ՀՀ երրորդ նախագահ Սերժ Սարգսյանին, «Ֆլեշ» ընկերության սեփականատեր Բարսեղ Բեգլարյանին եւ գյուղնախարարության նախկին պաշտոնյա Գեւորգ Հարությունյանին ճանաչել մեղավոր եւ ազատել պատասխանատվությունից՝ վաղեմության ժամկետի հիմքով:
«Եզրափակիչ խոսքի ցանկություն չունեմ», – դատարանում հայտարարեց երրորդ նախագահ Սերժ Սարգսյանը։
«Ֆլեշ» ընկերության սեփականատեր Բարսեղ Բեգլարյանն էլ ասաց․ «Շատ շատերը գիտեն, որ այս գործը, ինչպես ժողովուրդն է ասում՝ կարած է»։ Նա դատավորին հորդորեց՝ անաչառ լինել որոշում կայացնելիս եւ արդար որոշում կայացնել։
Մանրամասները՝ տեսանյութում
Կարդացեք նաև
Գյուղնախարարության նախկին պաշտոնյա, մեղադրյալ Գեւորգ Հարությունյանն էլ իր եզրափակիչ խոսքում ասաց, որ ծրագրին դիմած մյուս ընկերությունները դատարանում ապացուցեցին՝ չէին կարող ծրագրի պահանջները բավարարող մատակարարումներ իրականացնել։ Արդեն հետին թվով էլ նա արձանագրում է՝ «Ֆլեշ» ընկերությունը պատշաճ է կատարել։
Մանրամասները՝ տեսանյութում
Դատարանը հեռացավ խորհրդակցական սենյակ․ որոշումը կհրապարակվի մայիսի 29-ին, 14․00-ին։
Հիշեցնենք, որ այդ գործով ՀՀ երրորդ նախագահ Սերժ Սարգսյանին մեղադրանք է առաջադրված առանձնապես խոշոր չափերով յուրացման/վատնման համար․ ըստ մեղադրանքի, նրա կազմակերպմամբ եւ «Ֆլեշ» ընկերության սեփականատեր Բարսեղ Բեգլարյանի դրդմամբ՝ 2013թ․ հունվարից մինչեւ փետրվարը կառավարության պահուստային ֆոնդից վատնվել է պետական աջակցության ծրագրերի իրականացման ընթացքում 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 ՀՀ դրամ: Այս գործով մեղադրյալի կարգավիճակում էին նաեւ ՀՀ գյուղատնտեսության նախկին նախարար Սերգո Կարապետյանն ու նրա տեղակալ Սամվել Գալստյանը, որոնց նկատմամբ քրեական հետապնդումը դադարեցվել է. նախկին պաշտոնյաները մահացել էին կորոնավիրուսից։
Նելլի ԳՐԻԳՈՐՅԱՆ
