Ռուբեն Վարդանյանի և մյուս հայ բանտարկյալների ազատ արձակման մասով շատ բան է արվում աշխարհի տարբեր խոշոր մայրաքաղաքներում։ Այս մասին CivilNet– ի հետ հարցազրույցում ասել է «Ավրորա» մարդասիրական նախաձեռնության համահիմնադիր, Ռուբեն Վարդանյանի գործընկեր Նուբար Աֆեյանը:
Նա միաժամանակ նշել է, որ որոշակի առումով կաշկանդվածություն կա, քանի որ այնպես է ստացվել, որ այս ժամանակահատվածում Հայաստանի և Ադրբեջանի միջև խաղաղության շատ զգայուն գործընթաց է ընթանում. «Կան մտահոգություններ, որ եթե ինչ-որ կերպ ճնշում գործադրեն բռնապետական ռեժիմի վրա, ապա դա կարող է հակառակ արդյունք տալ՝ բացասաբար ազդելով Հայաստանի անվտանգության վրա։ Առաջին հայացքից սա արդարացի մտահոգություն է, բայց եթե դուք խրախուսում եք այդ մտահոգությունը, ապա դուք խրախուսում եք այդ պահվածքը, և այդ անպատժելիությունն էլ հանգեցնում է նրան, որ նրանք կանգ չեն առնում»:
Նա ընդգծել է, որ տևական խաղաղության հասնելու միակ ճանապարհն այն է, որ այդ խաղաղությունը հիմնված լինի նախևառաջ անարդարության վերացման վրա, լինի դա բանտարկյալների միջոցով, թե բռնի կերպով տեղահանված Արցախի բնակչության մասին մտածելու միջոցով»: «Դա, ինձ համար, խաղաղության հասնելու կարևոր մասն է։ Դա չպետք է դիտարկվի որպես խոչընդոտ՝ խաղաղության հասնելու ճանապարհին: Այն պետք է խաղաղության անքակտելի մասը լինի», – ասել է նա՝ հավելելով, որ շարունակելու են աշխատանքները։
Նա նկատել է, որ Ադրբեջանի, որպես COP29-ը հյուրընկալող երկիր ընտրվելուց հետո, նրանց անպատժելիությունն ավելի է աճել. «Կարծում եմ, որ COP29-ի նախաշեմին համաշխարհային տերությունների կողմից հանրաքվեի նման մի բան է անցկացվելու, թե արդյոք նրանք ցանկանում են այդօրինակ պահվածքը խրախուսել, թե ցանկանում են հստակ դիրք գրավել։ Հուսով ենք, որ մեր հարևաններն Ադրբեջանում և նրանց ղեկավարությունը կհասկանան, որ իրենց իսկ շահերից է բխում այս խնդրի լուծումը՝ որպես խաղաղության հաստատման մաս: Ես հասկանում եմ, որ Հայաստանի կառավարությունը դժվարին իրավիճակում է՝ այս հարցի առնչությամբ հանրային դիրքորոշում հայտնելու առումով, բայց ես ակնկալում եմ, որ մասնավոր հարթակում այս հարցն ընդգրկված է օրակարգի առանցքային հատվածում։ Այնուհանդերձ, եթե նրանք այդ հարցը ներառեն օրակարգի ստորին հատվածում, ապա դա կհանգեցնի հակառակ արդյունքի, քանի որ նման խաղաղությունը երբեք երկարատև չի լինելու»:
Կարդացեք նաև
Մամուլի հաղորդագրություն
