Արծաթը բժշկական նպատակներով կիրառվել է վաղուց ի վեր, իսկ կոլոիդային արծաթն օգտագործվել է վարակների դեմ պայքարում մինչ հակաբիոտիկների հայտնաբերումը։ Սակայն այսօր թույլատրվում է արծաթի նանոմասնիկներ պարունակող միջոցների միայն արտաքին օգտագործումը։
Ինչպե՞ս են ազդում այդ նանոմասնիկները․ դրանք կարող են ներթափանցել բակտերիաների մեջ և կպչել որոշ սպիտակուցներին՝ փոփոխելով մանրէների կառուցվածքն ու դրանք «անգործունակ» դարձնելով։
Նաև համարվում է, որ արծաթի մոլեկուլներն ընդունակ են կապվելու որոշ սնկերի, վիրուսների ու մակաբույծների ֆերմենտների հետ՝ ճնշելով դրանց ակտիվությունը։ Այսպիսով, կոլոիդ արծաթն ունի մանրէասպան, հակասնկային, հակավիրուսային և հակաբորբոքային ազդեցություն։
Այն թողարկվում է քսուկների, ցողաշիթերի տեսքով։
Կարդացեք նաև
Ի տարբերություն հակաբակտերիալ դեղամիջոցների, արծաթի նկատմամբ մանրէները կայունություն ձեռք չեն բերում:
Արծաթի նանոմասնիկներ պարունակող միջոցները կիրառվում են մաշկի խնամքի համար, վերքերի, այրվածքների և խոցերի դեպքում: Դրանք կարող են նպաստել բերանի խոռոչի հիվանդությունների բուժմանը, կարիեսի, լնդերի բորբոքումների կանխարգելմանը։ Հոտազերծիչ ազդեցության շնորհիվ կոլոիդային արծաթը կարող է օգնել ոտքերի տհաճ հոտը վերացնելու հարցում։
Կոլոիդային արծաթը կարող է օգնել ազատվել քթի փակվածությունից, շնչառական վարակներից՝ չգրգռելով և չվնասելով քթի լորձաթաղանթը։
Պատրաստեց Մարինե ԱԼԵՔՍԱՆՅԱՆԸ
