«Եկել է նաեւ ժամանակը, որ մենք քննարկենք, հասկանանք, թե այն հարկային պարտավորությունները, որոնք բոլորի համար ՀՀ-ում առկա են, եկեղեցու հանդեպ ինչո՞ւ չեն կիրառվում»,- ԱԺ նստաշրջանում ասաց ԱԺ նախագահ Ալեն Սիմոնյանը՝ անդրադառնալով «Տավուշը հանուն Հայաստանի» շարժմանը։
«Տեղի է ունենում հետեւյալը, կրկին անգամ փորձ արվեց մարդկանց հույզերի վրա խաղալով՝ շարժում գեներացնել։ Փորձը չհաջողվեց, եւ հիմա ելքի ստրատեգիա է ընտրվում, դե պետք է իրավիճակից դուրս գան ինչ-որ ձեւով։ Ես շատ ցավում եմ, որ Եկեղեցին ներքաշվեց այս ամեն ինչի մեջ։ Ես կարծում եմ, որ եկել է նաեւ ժամանակը, որ մենք քննարկենք, հասկանանք, թե այն հարկային պարտավորությունները, որոնք բոլորի համար ՀՀ-ում առկա են, եկեղեցու հանդեպ ինչո՞ւ դա չեն կիրառվում։ Եվ ես կարծում եմ, որ այդ հարցը պետք է մոտ ժամանակներս քննարկենք։ Հերիք եղավ էլի մեր էմոցիաների, պատմության, արդեն իսկ քաղաքական դաշտում գործ անելու համար գնալ աշխարհասփյուռ հայությունից փող հավաքել, հարստանալ, մոմ ծախել, կոկա-կոլա ծախել, գինի ծախել, գինու ռեստորաններ ունենալ ու հարկ չվճարել։ Ես ուզում եմ հասկանալ՝ ինչո՞ւ պետք է նրանք հարկ չվճարեն։ Օրենսդրական առումով մենք պետք է վերանայենք, հասկանաք, թե ինչով է եկեղեցականը, որի թաթիկը համբուրում են, օրենքից բարձր, հասարակ գործարարից բարձր, որը հարկ է վճարում, որը բանակի համար փամփուշտ է գնում։ Մեր մեծ հարկատուները ամենակարեւոր մարդիկ են, իրենք ֆինանսավորում են ՀՀ անվտանգությունը։ Այդ մարդիկ պետք է հարկ վճարեն, իրենք չպետք է վճարե՞ն»,- ասաց Ալեն Սիմոնյանը։
Նրա խոսքով՝ Ամենայն Հայոց Կաթողիկոսը Երեւանի կենտրոնում նստավայր ունի․ «Եկեղեցի կա Սուրբ Աննայի անվան, որտեղ միտինգներ են անցկացնում։ Այ քեզ բան, սեփական միտինգի գրասենյա՞կ է, այդ ո՞վ է ձեզ թույլ տվել մտնել իմ Հայ առաքելական եկեղեցու շինություն եւ միտինգներ կազմակերպել։ Այդտեղ Աստծո հետ հաղոդակցվելու տեղ է, միտինգներ կազմակերպելու տեղ չէ։ Իսկ դուք Աստված չեք եւ Աստծուց շատ հեռու եք»։
Ռոզա ՀՈՎՀԱՆՆԻՍՅԱՆ
