«Բռունցքդ բեր» նախաձեռնության հայտարարությունը Տավուշի գյուղերի վրա իրականացվող ճնշումների և ադրբեջանական տեխնիկայի ակտիվ աշխատանքների վերաբերյալ.
Մտահոգված ենք Հայաստանի Հանրապետության Կիրանց և Ոսկեպար գյուղերի իրավիճակով, որոնք ուժային կառույցների կողմից շրջափակման մեջ են պահվել, և հատկապես ազդակիր համայնքների դիմացի հատվածում ադրբեջանական տեխնիկայի ակտիվ աշխատանքներով:
Հայտարարում ենք, որ վարչակազմի գործողությունները ոչ միայն մոլորության մեջ են պահում հանրությանը, այլև ուժային կառույցներին են ուղղորդում անհեթեթ գործարկումների, ինչը նրանց շեղում է իրենց հիմնական աշխատանքներից՝ Հայաստանի Հանրապետության և ՀՀ քաղաքացիների անվտանգության ապահովումից:
1.Պետք է սատար կանգնենք յուրաքանչյուր քաղաքացու, պաշտպանենք նրանց իրավունքները և թույլ չտանք վարչակազմին ուժային կառույցներով ճնշում գործադրել՝ վերածելով դա հոգեբանական ճնշման:
2.Արցախում կիրառված այս սցենարը, որը հանգեցրեց ագրեսիայի և էթնիկ զտումների, այժմ կիրառվում է Տավուշի մարզի գյուղերի վրա: Մենք չպետք է թույլ տանք, որ այս քաղաքականությունը կրկնվի:
3.Ադրբեջանը պետք է պատասխանատվություն կրի իր ցեղասպանական քաղաքականության, Հայաստանի տարածքների ու Արցախի օկուպացիայի և ռազմագերիներ պահելու համար:
4.Մենք պարտավորվում ենք պաշտպանել Հայաստանի Հանրապետության ինքնիշխանությունն ու ժողովրդավարությունը, ինչպես նաև մեր քաղաքացիների իրավունքները՝ միջազգային նորմերի և Հայաստանի Հանրապետության Սահմանադրության համաձայն:
5.Մենք չենք ընդունում պաշտպանական գծերի չեզոքացումը և գյուղաբնակ քաղաքացիների վրա ճնշումները, որոնց մոտալուտ նպատակը՝ այսպես կոչված «անկլավների» հանձնումն է:
Սույն հայտարարությանը կից ներկայացնում ենք լուսանկարներ, որոնք վկայում են մեր նշած իրավիճակը ադրբեջանական ուժերի աշխատանքների մասին և մեր պայքարի արդարությունն ու անհրաժեշտությունը:
