«Ես այստեղ վերապրեցի այն, ինչ եղել էր Արցախում՝ ադրբեջանական անցագրային կետում»,-Aravot.am-ի հետ զրույցում ասաց արցախցի երգչուհի Գայա Արզումանյանը:
«Կիրանցի մատույցներում հանդիպելով ոստիկանական շարքերին՝ մտածեցի, որ սրբազանը կմոտենա նրանց, կզրուցի նրանց հետ, նրանք ճանապարհը կբացեն սրբազանի ու նրան ուղեկցողների առջեւ, որպեսզի նա գնա հանդիպի իր զավակներին, բայց ոստիկանները չլսեցին, կանգնեցին Բագրատ սրբազանի դեմ: Այդպես կարող են վարվել միայն ադրբեջանցիները:
Ես ոստիկաններից լսեցի, որ Կիրանցի մի հատվածն անցնում է Ադրբեջանին, մոտեցա նրանց եւ կատակով ասացի, թեեւ դա լացելու է, եթե Կիրանցն անցում է Ադրբեջանին, դա Ադրբեջան է, իմ անձնագրի մեջ 070 կոդն է, որը, ըստ ՀՀ իշխանությունների նույնպես Ադրբեջան է: Եթե այդպես է, թույլ տվեք գնամ Ադրբեջան»,-հավելեց երգչուհին:
Աշոտ ՀԱԿՈԲՅԱՆ
