ՀՀ տարածքային կառավարման և ենթակառուցվածքների նախարար Գնել Սանոսյանը հանդիպել է կիրանցիների հետ: Նրան գյուղացիները տարբեր հարցեր են ուղղում՝ սկսած գյուղը կիսվելուց, վերջացրած անվտանգության երաշխիքներով: Սանոսյանը անորոշ պատասխաններ է տալիս:
Լրագրող Անի Գեւորգյանի՝ անվտանգության երաշխիքների վերաբերյալ ի պատասխան, նախարարն ասաց. «Որ ճանապարհը կառուցենք, ինքն իրենով կլինի անվտանգություն: Մենք փորձում ենք ստեղծված իրավիճակը կառավարել… Որ էս երկիրը հինգ օր թողնենք ձեզ, խաղաղություն չի լինի»:
Հարցին՝ փաստորեն նախ ստորագրել են, նոր են եկել քննարկման, գյուղացիների հետ հանդիպման, նոր են ծանոթանում իրավիճակին, նախարարն ասաց, որ պարտադիր չէ իր՝ ամեն օր գյուղ գալը, քանի որ համայնքի ղեկավարից տեղեկանում են իրավիճակի մասին:
«Տեղի է ունեցել սահմանազատման, սահմանագծման պրոցես, այդ պրոցեսին հաջորդում է այլ պրոցես: Մարդիկ հետաքրքրվում են արդարացիորեն, մենք հարցերին ենք պատասխանում: Մենք գիտենք, որ մոտավոր ճանապարհն ինչպես է անցնում, մարդկանց նախնական տարբերակն ասել ենք, մնացածը շինարարության ընթացքում պարզ կլինի»,-ասաց Սանոսյանը:
Կարդացեք նաև
Գյուղում ծանր վիճակ էր, սահմանազատման հետեւանքով իրենց օրինական սեփականությունը կորցնող կանայք լաց էին լինում: «Թուրքին բերում են կանգնեցնեն, ի՞նչ անվտանգության երաշխիք, սկսի իրենք չգիտեն, ինչ է լինելու, ծախել են պրծել թուրքերին, էլ ինչ են ուզում»,-ասաց կանանցից մեկը:
Գոհար ՀԱԿՈԲՅԱՆ
