Բռնցքամարտի Հայաստանի տղամարդկանց հավաքականը այս օրերին ընդլայնված կազմով ուսումնամարզական հավաք է անցկացնում։ Տղաները նախապատրաստվում են Թաիլանդում կայանալիք օլիմպիական վարկանիշային վերջին մրցաշարին։
Ազգային հավաքականի գլխավոր մարզիչ Կարեն Աղամալյանը Aravot.am-ին ասաց, որ բարդ մրցաշար է սպասվում եւ կարելի է ասել, որ տղաները գնում են «պատերազմ»։
«Քաշային կարգեր կան, որտեղ հանդես է գալու շուրջ 60-70 մարզիկ։ Իսկ օլիմպիական ուղեգիր նվաճելու համար որոշ բռնցքամարտիկներ ստիպված պետք է անցկացնեն առնվազն չորս մենամարտ»,-ասաց Կարեն Աղամալյանը։
Նրա խոսքով, մեր ընտրանուց միայն Հովհաննես Բաչկովը դեռ չի հասցրել լրիվ ապաքինվել վնասվածքից ու դրա պատճառով չի մասնակցելու նաեւ այս մրցաշարին, իսկ մյուս տղաները լավ մարզավիճակում են։
Կարդացեք նաև
Գլխավոր մարզիչը մեզ նաեւ տրամադրեց այն բռնցքամարտիկների անունները, որոնք մեկնելու են մրցավայր։
Թաիլանդի ռինգում կմենամարտեն 51 կգ քաշային Բարեղամ Հարությունյանը, 57 կգ` զարթուր Բազեյանը, 63,5 կգ’ Նարեկ Հովհաննիսյանը, 71 կգ’ Գուրգեն Մադոյանը, 80 կգ’ Ռաֆայել Հովհաննիսյանը, 92 կգ’ Նարեկ Մանասյանը եւ +92կգ` Դավիթ Չալոյանը։
Մեր բռնցքամարտիկներն առայժմ Փարիզի օլիմպիական խաղերի ուղեգիր չունեն։
Աշոտ ՀԱԿՈԲՅԱՆ
