«Ես ուզում եմ իմ հրաժարականը տամ: Ես ձեր հետ եմ, իմ ժողովրդի հետ եմ: Տա՞մ էդ հրաժարականը, ի՞նչ եք ասում: Հետո չասեք, թողեց, թռավ: Ես իմ ժողովրդի հետ եմ, ապրեմ էլ, մեռնեմ էլ ժողովրդի հետ եմ»,- այսօր Կիրանցի գյուղամիջում հավաքված կիրանցիներին մոտենալով՝ այս հարցը նրանց ուղղեց Կիրանցի գյուղապետ Կամո Շահինյանը (լուսանկարում):
Հիշեցնենք, որ Տավուշի մարզում սահմանազատման աշխատանքները Նիկոլ Փաշինյանն այսօր կառավարության նիստի ժամանակ համարեց բարեհաջող ավարտված:
«Հրաժարականի միտք չեմ տեսնում, դու միշտ էլ ժողովրդի հետ ես եղել, մենք դա տեսել ենք, դա գիտենք»,- միաբերան պատասխանեցին կիրանցիները:
Բնակիչները պնդեցին. «Մնա գյուղապետ, միայն թե վերեւներից ոչ մեկին մի ընդունի քո գրասենյակ»:
Կարդացեք նաև
«Կառավարությունից մարդ է գալիս Իջեւան, ասում են ակտիվներից թող հավաքվեն, գան խոսենք»,-կիրանցիներին փոխանցեց այս լուրը գյուղապետը: Լուրը լսելուց բնակիչները զայրացան, վիրավորական արտահայտություններ նետեցին կառավարության անդամների հասցեին:
«Մենք՝ բոլորս էլ ակտիվ ենք, սաղս էլ խոսելու տեղ ունենք, Իջեւան գնալու չունենք, թող իրենք գան»,-հակադարձեց մի գյուղացի, որի ասածին միացան բոլոր բնակիչները:
«Եթե չեք ընդունում հրաժարականս, ուրեմն կմնամ, բայց իմ ժողովրդի հետ: Ես էս ժողովրդի գյուղապետն եմ, հանրապետության ինչ-որ մեկի շահերը պահողը չեմ: Էլի եմ ասում, կարող եմ հրաժարական տալ ու մնալ ձեր կողքին: Չեք ուզում հրաժարական, էլի ձեր կողքին եմ»,- եզրափակեց գյուղապետը:
Արփինե ՍԻՄՈՆՅԱՆ
