2014 թվականի հոկտեմբերի կեսերից արդարադատության նախարարության «Արթիկ» ՔԿՀ տեղափոխվեց «Վահան Հովհաննիսյան+ 30» գործով դատապարտված Տիգրան Ավետիսյանը: Մինչ այդ նա «Նուբարաշեն» քրեակատարողական հիմնարկում էր: «Արթիկում» առաջին անգամ ցմահ ազատազրկվածի նկատմամբ կիրառվեց կիսափակ ռեժիմ:
54-ամյա Տիգրան Ավետիսյանը արդեն 30 տարի անազատության մեջ է:
Օրեր առաջ՝ մայիսի 10-ին Շիրակի մարզի ընդհանուր իրավասության դատարանի Մարալիկի նստավայրում լսվեց նրա դիմումը՝ բաց ռեժիմի անցնելու խնդրանքով:
Տիգրանը կալանավորվել է 1995թ. օգոստոսի 23-ին: 1997թ. դեկտեմբերին նա դատապարտվեց պատժի առավելագույն չափի՝ մահապատժի: Տիգրանն անազատության տարիներին որեւէ նկատողություն չի ստացել, չկան տուժողներ, հայցապահանջ նրա դեմ:
Կարդացեք նաև
Հիշեցնեմ, որ Տիգրան Ավետիսյանը «Արծիվ-28» ջոկատի կամավորական գումարտակի կազմում 1993թ. մարտից-նոյեմբեր ժամանակահատվածում մասնակցել է ԼՂՀ Մարտակերտի շրջանի ազատագրման մարտերին: Տիգրանը «Արաբո» ջոկատի կազմում 1990-1993թթ. մասնակցել է Երասխավան, Դավիթ-Բեկ գյուղերի ինքնապաշտպանությանը, ԼՂՀ Կարադաղլու, Մալիրեյլի, իսկ «Կոռնիձոր» ջոկատի կազմում՝ Հորադիզի մարտական գործողություններին:
Տիգրան Ավետիսյանը դատարանից խնդրել է. «Թողեք վերջապես դուրս գամ, ընտանիք կազմեմ», բաց ռեժիմի ժամանակ նա կարող է առավոտյան աշխատել, երեկոյան վերադառնալ քրեակատարողական հիմնարկ: «Առավոտի» տեղեկություններով՝ որոշումը դատարանը հնարավոր է հրապարակի տասը օրից:
Ռուզան ՄԻՆԱՍՅԱՆ
«Առավոտ» օրաթերթ
14.05.2024
