«Հայաստանը նորից ալեկոծ ժամանակաշրջան է ապրում, եւ այս օրերով պայմանավորված կլինի Հայաստանի մոտակա ապագան: Ազգային Ժողովրդավարական Բեւեռը, որպես ազգային ժողովրդավար ուժ, չէր կարող մի կողմ քաշվել այս իրավիճակից եւ լինել անտարբեր»,-ասուլիսում նշեց ԱԺԲ խորհրդի անդամ Արա Պապյանը:
Հայտարարեց, որ խորհրդով երկար օրեր ու ժամեր քննարկելուց հետո՝ եկել են միաձայն որոշման, որ նրա ձեւակերպմամբ՝ պետք է առավելագույնն անեն վերահաստատելու համար ժողովրդի իշխանությունը, քանի որ Նիկոլ Փաշինյանն այլեւս չի կարող հանդես գալ ժողովրդի անունից. «Նրա խոստումները եւ գործունեությունը տրամագծորեն հակառակ են, իրարամերժ: Նաեւ համարում ենք, որ այս փոփոխությունը հնարավորություն կտա, որ մոտ ապագայում Հայաստանում ձեւավորվի իրավիճակ, որի շնորհիվ մեր գաղափարները մեր միջոցով կամ այլ ուժերի հետ համագործակցելով կդարձնենք իրականություն»:
Արա Պապյանն ասաց, որ ԱԺԲ-ն միշտ էլ հանդես է եկել Փաշինյանի հրաժարականի պահանջով, քանի որ իրենց համար ակնհայտ է եղել, որ շատ խնդիրների պատճառը եւ հիմքը Փաշինյանի կառավարումն է, նրա՝ սկզբունքորեն սխալ դիրքորոշումը պատերազմի, Արցախի, սահմանների եւ ցանկացած հարցի վերաբերյալ: ԱԺԲ խորհրդի անդամն ընդգծեց, որ Տավուշում սկսված գործընթացը ԱԺԲ-ն համարել է հակասահմանադրական, ինչի դեմ բողոքել է Երեւանի փողոցներում:
«Շատերը մեզ մեղադրում են, թե միացել եք պրոռուսական ուժերի, բայց ես ասում եմ՝ մենք որեւէ մեկի չենք միացել, մենք որոշ ուժերի հետ համագործակցում ենք հստակ հարցերի շուրջ: Համագործակցել ենք Տավուշում անօրինական սահմանազատման դեմ, բնական է, որ պետք է համագործակցեինք, բա մեր հողերը տալիս էին, չանեի՞նք: Համագործակցում ենք նաեւ Նիկոլ Փաշինյանին իշխանությունից հեռացման հարցում: Կլինեն հարցեր, որոնց շուտ կարող ենք համագործակցել՝ կհամագործակցենք, չեն լինի՝ չենք համագործակցի»,-ընդգծեց Արա Պապյանը:
Կարդացեք նաև
Գոհար ՀԱԿՈԲՅԱՆ
