«Մեզ անընդհատ ասում են՝ գործողություն, գործողություն, գործողություն, վստահաբար, շատերը չեն պատկերացնում, թե ինչ է այդ գործողությունը։ Մենք այս պահին գործողություն ենք անում, այն գործիքներով, որոնք ունենք։ Հաջորդ քայլին մյուս գործիքները կավելանան՝ նույնը կանենք։ Հետեւաբար, մեր ամենակարեւոր հաղթաթուղթը լինելու է համբերությունը եւ նպատակի սահմանումն ու դրան հասնելը»,-այս մասին այսօր Հանրապետության հրապարակում ամփոփելով այսօրվա անհնազանդության ցույցերը՝ հայտարարեց Հայ Առաքելական Եկեղեցու Տավուշի թեմի առաջնորդ Բագրատ արքեպիսկոպոս Գալստանյանը։
Բագրատ սրբազանը ուսանողներին շնորհակալություն հայտնեց, որ արձագանքել են ու դասադուլ արել, ապա հայտարարեց՝ վստահ եմ՝ երկուշաբթի օրվանից է՛լ ավելի մեծ թափով է լինելու։
«Ուսանողներ ջան, մենք ձեզ հետ կարեւոր գործ ունենք անելու, այդ մասին երեկոյան կխոսենք։ Ուղղակի բացահայտվել են շատ բարձրակարգ դասախոսներ, պրոֆեսորներ, որոնք գրասեղանի հետեւում այլ բան են սովորեցնում, կյանքում իրենց վարքագծով մի այլ բան են ասում։ Օրինակ՝ Բրյուսովի ռեկտորը։ Իմ ճանաչած Դավիթ Գյուրջինյանը ինստիտուտի դուռը փակել է, որպեսզի աշակերտներն ինքնակամ իրենց կամքը չարտահայտեն։ Բռնացել է ազատ կամքի վրա, միգուցե կարելի է իրավական գործընթաց սկսել, որ բռնացնել է մարդկանց վրա։ Դավիթ Գյուրջինյան, դու սովորեցրել ես Հայոց լեզու, Հայոց պատմություն, հայրենիք սիրել, ես այդպես եմ քեզ ճանաչել եւ չեմ կարծում, որ այդ գայթակղիչ պաշտոն ունենալու հանգամանքը ձեզ փոխել է: Չեմ ուզում որեւէ ձեւով թշնամություն ստեղծել ձեր հանդեպ, բայց ձեր արածը ճիշտ չէ։ Մյուսներին էլ է վերաբերում՝ պետք չէ սպասել, որ շենքերը փակեն, նոր սկսեք ընդվզել, սիրելի ժողովուրդ, սիրելի հաստատությունների անդամներ, գրողների միություն, նկարիչների միություն, թատրոններ, ինստիտուտներ, կոնսերվատորիա, Բրյուսով, բոլորը»,-ասաց Բագրատ սրբազանը։
Կարդացեք նաև
Նելլի ԲԱԲԱՅԱՆ
