«Տավուշը հանուն հայրենիքի» շարժման առաջնորդ՝ Հայ Առաքելական Եկեղեցու Տավուշի թեմի առաջնորդ Բագրատ արքեպիսկոպոս Գալստանյանը լրագրողների հետ ճեպազրույցում անդրադարձավ նախկին արտգործնախարար Վարդան Օսկանյանի այն հայտարարությանը, որ վարչապետի թեկնածուն հենց Բագրատ Սրբազանը պետք է լինի։
«Ես անկեղծորեն շնորհակալ եմ պարոն Օսկանյանին, բայց ես այդ հավակնությունը ոչ ունեմ, ոչ էլ ցանկություն ունեմ, ոչ էլ կարծում եմ, որ ճիշտ է։ Ես սկզբունքով կարծում եմ, որ ճիշտ չէ դա, ոչ էլ հավակնություն ունեմ»,- ասաց Բագրատ Սրբազանը։
Հարցին, եթե շարժմանը միացած անձանց մեծ մասն իրեն տեսնի վարչապետ, ի՞նչ կորոշի, նա պատասխանեց․ «Ընթացքը կորոշի, Աստծո կամոք է ամեն ինչ տեղի ունենում, Տիրոջ կամքով էլ թող գնա ընթացքը։ Մարդկային ջանքերը, այո կարեւոր են, բայց ի վերջո աստվածային նախախնամությունն է մեզ ուղղորդողը միշտ։ Ես այդ ճանապարհին եմ հավատում։ Թող գա ժամանակը, կիմանանք»։
Կարդացեք նաև
Անդրադառնալով հարցին, որ Նիկոլ Փաշինյանի ընտանիքին պատկանող «Հայկական ժամանակը» գրել է, որ օրակարգում Բագրատ Սրբազանին մեկուսացնելու հարցն է, նա ասաց․ «Հայկական ժամանակն» ի՞նչ է, իրենք տեղյա՞կ են պետական բոլոր գործառույթներից։ Այսինքն՝ մեկուսացման որոշումը հրապարակված կա՞, պետությունն այդպես է չէ կառավարվում՝ անձնական աղբյուրներով։ Ձյուն գա ձեր գլխին, սա թող մնա իրենց համար որպես դեւիզ, այն էլ ամառ օրով»։
Ռոզա ՀՈՎՀԱՆՆԻՍՅԱՆ
