Լուրեր էին տարածվել, թե իբր Բագրատ սրբազանը, երբ իջավ Հանրապետության հրապարակում հարթակից՝ գնաց հանդիպելու երկրորդ նախագահ Ռոբերտ Քոչարյանի հետ: Քիչ առաջ սրբազանը ուղիղ եթերում ցույց է տվել, թե ինչու է հեռացել. «Ժողովուրդ ջան, քիչ հետո ես կգամ հրապարակ, կհանդիպենք: Իշխանական ստախոսության մունետիկները վերստին սկսել են իրենց ստի տարածումը: Ես եկել եմ ոտքերս վիրակապելու, որովհետեւ այտուցված են: Ոչ ոք չգիտեր սրա մասին»,- ասաց սրբազանը եւ ցույց տվեց, թե ինչ վերքերի մեջ են ոտքերը:
«Է՞ս էիք ուզում ստացե՛ք: Նկարիր: Մի քիչ ցավերս նվազեն, վերադառնամ, ես ոչ Ռոբերտ Քոչարյանի մոտ եմ գնացել, ժողովուրդ ջան, ոչ Սերժ Սարգսյանի մոտ, ոչ Հռոմի պապի մոտ, ո՛չ Լեւոն Տեր-Պետրոսյանի մոտ, ո՛չ էլ տիեզերական պատրիարքի մոտ»,- ասաց սրբազանը՝ հայտարարելով, որ ինքը երբեք չի ստում, ասել է մնալու է հրապարակում, այդպես էլ անելու է:
Հռիփսիմե ՋԵԲԵՋՅԱՆ
Հոռետեսության համար չեմ ծնվել
Եվ դեմ եմ հիմար լավատեսության,
Սակայն շատերից մեկն էլ ես՝ գիտե՛մ.
Դու էիր, որ մեզ անըստգյուտ գյուտովդ ուսուցանեցիր,
ՈՐ ԱՆՀՆԱՐԻՆ ՎԻՃԱԿՆ Է ՄԻԱՅՆ ԾՆՈՒՄ ՆՈՐ ՀՆԱՐ։
Ուստի հավատա, ո՜վ Հնարավոր,
Որ եթե մի օր – աստվա՜ծ չարասցե –
Գտած հնարըդ դառնա գործազուրկ,
ԱՍՊԱՐԵԶ ԿԻՋՆԻ ՄԵԿՆ ԷԼ, ԱՆԿԱՍԿԱԾ,
ՈՐ ՍԿԻԶԲ ԿՏԱ ՄԻ ՆՈ՛Ր ՍԽՐԱՆՔԻ։
Հանճարեղ Պարույր Սևակն իր այս տողերը նվիրել է հայ գրերի ստեղծող մեր Սուրբ Մեսրոպ Մաշտոցին: Խորիմաստ և երկարակյաց տողերն այս վերաբերելի են նաև ԱՆՀՆԱՐԻՆ ՎԻՃԱԿ ԹՎԱՑՈՂ մեր օրերին, որոնք կարծես ԾՆՈՒՄ ԵՆ ՆՈՐ ՀՆԱՐ, վերաբերելի են Բագրատ Սրբազանի ԱՍՊԱՐԵԶ ԻՋՆԵԼՈՒՆ, ՈՐԸ ՍԿԻԶԲ Է ՏԱԼՈՒ ՄԻ ՆՈՐ ՍԽՐԱՆՔԻ:
Կյանքը ցույց է տալիս, որ Բագրատ Սրբազանը գերազանցում է մեր ներկայիս քաղաքական առաջնորդներին տարբեր առումներով՝ իր հավասարակշռվածությամբ, կրթական մակարդակով, անմիջականությամբ, խարիզմայով, մարդկանց համախմբելու կարողությամբ, ճշմարտախոսությամբ և վճռականությամբ: Այնպես որ, մեր ամբողջ քաղաքական կուսակցությունները պարտավոր են հայ ազգի համար բախտորոշ այս ժամանակաշրջանում ընդունել Բագրատ Սրբազանի առաջնորդությունը Հայրենիքի փրկության համար մղվող այս ժողովրդական պայքարում և զորակցել նրան՝ խոնարհաբար կանգնելով հրապարակում: