«Պատասխան ունենք ստանալիք, պիտի պատասխան ստանանք: Այս ժողովուրդն ինքնակամ դուրս է եկել՝ պատասխան ստանալու: Կտա՞ն այդ պատասխանը՝ կտան. մնացած բոլոր բաները դատարկաբանություն են, ամոթ է»,- Աբովյան քաղաքից դեպի Երեւան երթի ժամանակ լրագրողների հետ զրույցում ասաց Հայ Առաքելական Եկեղեցու Տավուշի թեմի առաջնորդ Բագրատ սրբազան Գալստանյանը՝ պատասխանելով հարցին՝ ինչո՞ւ այսօր քաղաքացիները լինեն Հանրապետության հրապարակում:
ԱԱԾ-ն եւ ՆԳՆ-ն,հայտարարություն էին տարածել՝ նախազգուշացնելով քայլերթի մասնակիցներին, որ անօրինական գործողությունների դեպքում իրենք գործելու են օրենքով սահմանված իրենց լիազորությունների շրջանակում:
Սրբազանը դիմեց իրավապահներին. «Ձեզ օրենքի սահմաններում կպահեք, անօրինական որեւէ գործողություն չեք կատարելու սեփական ժողովրդի նկատմամբ, որեւէ բռնություն չեք կիրառելու: Ես առաջինն եմ կանգնած լինելու այդ շարքում, մենք կանգնելու ենք ձեր դիմաց, ինչպես Կիրանցում, ձեր գործողության ժամանակ ասացի: Այս ժողովուրդն անտեր ժողովուրդ չի, վախեցրել եք, անզորության զգացողություն եք ներարկել»:
Նաեւ ներքին գործերի նախարարին դիմեց. «Վահե Ղազարյան, մենք միասին ճաշել ենք, հաց ու աղ ենք բաժանել, լավ էլ ճանաչում եմ ձեզ, դուք էլ ինձ եք ճանաչում: Որեւէ հրահրում, ապօրինի գործողություն՝ առաջին պատասխանատուն դուք եք լինելու եւ ձեր անմիջական ղեկավարը: Դիմում եմ բոլոր իջեւանցիներին՝ դուք էլ կիսում եք իմ մոտեցումները, հոգ չի, որ պատերի տակ եք կիսում»:
Կարդացեք նաև
Սրբազանը հավելեց՝ եկել ենք խաղաղ, հանգիստ՝ առանց ագրեսիայի, հաշտության կոչով, ներելու պատրաստ, հաղթանակի տեսիլքով, ուստի բախումների նախադրյալներ չի տեսնում:
«Մենք մնալու ենք այնքան, մինչեւ մեր նպատակներն ու պահանջներն իրականացվեն, իսկ որոնք են դրանք՝ այսօր կլսեք»,- ասաց նա:
Մանրամասները՝ տեսանյութում
Հիշեցնենք, բողոքն ընդդեմ անօրինական սահմանազատման եւ սահմանագծման է, ինչի արդյունքում Ադրբեջանին են փոխանցվում ոչ միայն Հայաստանի իրավազորության տակ գտնվող տարածքները, այլ հենց ՀՀ ինքնիշխան տարածքները։ Դեպի Երեւան երթը մեկնարկել է մայիսի 4-ին։
Նելլի ԳՐԻԳՈՐՅԱՆ
