Այսօր «Տավուշը հանուն հայրենիքի» շարժման երթը, ինչպես տեղեկացրել ենք, մեկնարկել է Չարենցավանից:
Երթին միացավ նաեւ ԵՊՀ արեւելագիտության ֆակուլտետի պրոֆեսոր Գուրգեն Մելիքյանը: Բագրատ սրբազանը հայտարարեց, որ ոչ թե Մելիքյանն է միացել, այլ իրենք են միացել շատ սիրելի նահապետին ու խոնարհվեց նրա առաջ. «Բոլորդ տեսել եք թե՛ արցունքները, թե՛ տառապանքը այս սքանչելի «կաղնի» մարդու, որը մեզ համար թե ներշնչման աղբյուր է, թե՛ քաջության, թե նվիրումի, թե՛ զոհաբերության, թե՛ ինտելեկտի, թե՛ մարդկային ամենաբարձր որակների, թե՛ հոգու հաղթանակի»:
Սրբազանը խնդրեց Գուրգեն Մելիքյանին հիշեցնել, թե ինչ էր գրված Բերձորի եկեղեցու ճակատին: Նա ասաց. «Թաղեցյալ լինինք, բայց ոչ խոնարհինք: Սա շատ կարեւոր կարգախոս է: Մենք չենք խոնարհվելու: Մովսես Խորենացին ասում է՝ «հյուսիսային ազգերի մեջ վեհագույնդ», վեհագույնը երբեք չի խոնարհվում»:
Բագրատ սրբազանն էլ հավելեց. «Բերձորի եկեղեցու ճակատին էր գրված՝ կթաղվեմ, բայց երբեք չեմ խոնարհվի: Սա նշանաբանն է եղել»:
Կարդացեք նաև
Գուրգեն Մելիքյանը լրագրողների հետ զրույցում ասաց. «Սրբազանի գործը ճշմարիտ է, հայոց գործն է սա: Հայաստանի՛գործն է: Մենք զինվորագրված ենք հայոց գործին, մինչեւ վերջ գնալու ենք, ով հայրենիքի կողմն է, մենք նրան կողմնակից: Արժեհամակարգի վրա է հարձակում եղել, մեր հավատքի վրա է հարձակում եղել, հավատացնում եմ ձեզ, որ մենք ուժ ենք գտնելու վերագտնելու մեզ ու քայլելու ենք հպարտ»:
Երթին են միացել նաեւ դիվանագետներ Ավետ Ադոնցը, Վահագն Մելիքյանը եւ այլք:
Հռիփսիմե ՋԵԲԵՋՅԱՆ
