Սանկտ Պետերբուրգի հանրահայտ «Imperial Orchestra»-ն մայիսի 18-ին եւ 19-ին հանդես կգա Երեւանում: Նվագախումբը կներկայացնի համաշխարհային սաունդթրեքերի երկու շոու՝ Cinema Medley «Interstellar» եւ Cinema Medley «Oppenheimer»: Ի դեպ, Cinema Medley շոուն արդեն դիտել է ավելի քան 500000 հանդիսատես: «Imperial Orchestra»-ի նվագացանկում ավելի քան 100 լեգենդար սաունդթրեքեր կան, որոնք ներառվել են Cinema Medley-ի մի քանի ծրագրերում:
Նվագախմբի տնօրեն Գուլիա Ռախմատուլինան ներկայացնելով «Imperial Orchestra»-ն՝ նշեց. «Ժամանակակից սաունդթրեքեր նվագելու համար մեկ սիմֆոնիկ նվագախումբը բավարար չէ. յուրաքանչյուր ֆիլմում օգտագործվում են յուրահատուկ գործիքներ, որոնք երբեմն ստեղծում են կոմպոզիտորները՝ փնտրելով օրիգինալ ձայն։ Մեր զինանոցում, բացի դասական երաժշտական գործիքներից, ունենք ժողովրդական գործիքների մեծ հավաքածու, ընդլայնված հարվածային խումբ և սինթետիկ հնչողություն։ Յուրաքանչյուր հնչյուն ստեղծվել է մեր ինժեներների կողմից, որոնք այն տեղավորել են սիմֆոնիկ սաունդթրեքերի նախագծի մեջ՝ դրանով իսկ թույլ տալով մոտենալ բնօրինակի յուրահատուկ ձայնին»:
Հավելեց, որ իրենց նվագախմբում ընդգրկված են բարձրակարգ երաժիշտներ՝ Մարիինյան թատրոնից, Մեծ թատրոնից, Սանկտ Պետերբուրգի ֆիլհարմոնիայի վաստակավոր անսամբլից: Գուլիա Ռախմատուլինայի ձեւակերպմամբ, եթե ֆիլմը հաջողված չլինի, սաունդթրեքը երբեք այդքան հայտնի չի դառնա, բայց մյուս կողմից երաժշտությունը կարող է ցանկացած ֆիլմին նոր երանգ հաղորդել:
Նա ընդգծեց, որ պարտադիր հետեւում են կինոաշխարհի նորություններին եւ կատարում սաունդթրեքեր, որոնք կարելի է լսել ոչ միայն մեր շոուներում, այլեւ կինոթատրոններում. «Օրինակ՝ կինոթատրոնում ֆիլմի համաշխարհային պրեմիերայի ժամանակ մենք ուղիղ եթերում կատարեցինք «Օփենհայմեր» ֆիլմի սաունդթրեքը։ Այսպիսով, դարձանք աշխարհում առաջին նվագախումբը, որը նվագեց «Օպենհայմեր»: Նաեւ ընդգծեց, որ սաունդթրեք ընտրելիս հիմնվում են հանդիսատեսի կարծիքի, երաժշտական նյութի եւ որակի վրա։
Ինչ վերաբերվում է երեւանյան ծրագրին, Գուլիա Ռախմատուլինան նշեց, որ ներկայացնելու են միանգամից երկու «Cinema Medley» շոու, որոնք ներառում են ավելի քան 30 ֆիլմերի երաժշտություն՝ «Հարի Փոթերից» մինչեւ «Ինտերսթելեր» եւ «Կարիբյան ծովի ծովահենները», ինչպես նաեւ «Ավատար», «Օպենհայմեր», «Մատանիների տիրակալը» ֆիլմերի սաունդրեքեր:
Դավիթ ԳՐԻԳՈՐՅԱՆ
