Կիսելով հատվածական սահմանազատման դեմ ընդվզող քաղաքացիների արդար ցասումը,
Նկատի ունենալով, որ վերջին օրերին Հայաստանի հակառակորդները կրկին բարձրացնում են ՀՀ Սյունիքի մարզի տարածքում ռուս-թուրք-ադրբեջանական վերահսկողությամբ ճանապարհի տրամադրման թեման,
Հաշվի առնելով, որ ՀՀ տարածքում ռուսական զորքերի ներկայությունը ուժի սպառնալիք է և իրական գործիք հայ-ադրբեջանական սահմանազատումը ռուս-ադրբեջանական շահերին ծառայեցնելու, ՀՀ-ի դեմ կանխատեսվող ռուս-ադրբեջանական ագրեսիան սպասարկելու համար,
Պահպանողական կուսակցությունը ՀՀ իշխանություններից կրկին պահանջում է օրակարգ բերել ՀՀ-ից ռուսական ռազմակայանը և ՌԴ բոլոր զինծառայողներին դուրս հրավիրելու հարցը։
Կարդացեք նաև
Համոզված ենք, որ ռուսական զորքերը դուրս հրավիրելու արդյունքում իրապես կչեզոքացվի Սյունիքի ուղղությամբ ռուս-ադրբեջանական կանխատեսվող ներխուժման վտանգը, հնարավոր կլինի իրականացնել հայ-ադրբեջանական հավասարակշված, հիմնավորված, քարտեզագրված, արդարացի և ամբողջական սահմանազատում, որը հասարակության համար ընկալելի կլինի, չի խախտի ներքին խաղաղությունը, չի հանգեցնի զանգվածային ընդվզումների, անցանկալի բախումների։
Պահպանողական կուսակցությունն ամբողջական սահմանազատում իրականացնելու, ռուս-ադրբեջանական կանխատեսվող ագրեսիան կանխելու, ՀՀ տարածքային ամբողջականությունն ու ինքնիշխան իրավունքները վերականգնելու նպատակ հետապնդող և հատվածական սահմանազատման դեմ արդարացի ընդվզող քաղաքացիներին և նախաձեռնություններին կոչ է անում իրենց պահանջների մեջ ներառել ռուսական ռազմակայանի և բոլոր ռուսական զորքերի անհապաղ դուրս հրավիրման հարցը։
Պահպանողական կուսակցության կենտրոնական խորհուրդ
