«Տավուշը հանուն հայրենիքի» քայլերթի մասնակիցներին Կոտայքի մարզի Սոլակ համայնքում միացան եզդիական համայնքի ներկայացուցիչները: Քայլերթն առաջնորդող Բագրատ սրբազան Գալստանյանը տեղեկացրեց, որ եզդիական համայնքի ներկայացուցիչները Կիրանցում եւ Ոսկեպարում էլ են պարբերաբար այցելել պայքարողներին:
«Ես ողջունում եմ ձեզ, Հայաստանը ձեր պետությունն է, նաեւ բոլոր պատերազմներին դուք ձեր մասնակցությունն եք ունեցել, որպես ոչ փոքրամասնություն, այլեւ ամբողջություն»,- ասաց սրբազանը:
Արմավիրի մարզի Նալբանդյան գյուղի բնակիչ, եզդի իրավապաշտպան Այսեր Իսայանն էլ ասաց. «Նաեւ եզդի ազգի զավակների արյունով է կերտված հայոց պետականության հիմքը: Բոլոր ժամանակներում միակ եղբայրական ազգն է եղել, որ մինչեւ վերջ, անդավաճան պայքարել է հայ ազգի հետ միասին. հայ ազգի հետ միասին տեսել է ցեղասպանությունը եւ այսօր պայքարին իմ միանալը ունի մեկ նշանաբան, որ իմ երեխան, ձեր երեխան, իր հայրենիքում իր օրորոցը դնելու տեղ ունենա, որ մայրն իր երեխայի համար, իր լեզվով օրորոցային երգի եւ չվախենա, որ կարող է յաթաղան ճոճվել: Եզդի ազգը հայոց հարցի եւ Արցախի հարցի բոլոր ժամանակների պահանջատերն է: Եղբայրը եղբոր թասիբը քաշողն է, իսկ ես եղբայր եմ, իմ ազգը եղբայր է» :
Մանրամասները՝ տեսանյութում
Կարդացեք նաև
Հիշեցնենք նաեւ, բողոքն ընդդեմ անօրինական սահմանազատման եւ սահմանագծման է, ինչի արդյունքում Ադրբեջանին են փոխանցվում ոչ միայն Հայաստանի իրավազորության տակ գտնվող տարածքները, այլ հենց ՀՀ ինքնիշխան տարածքները։ Դեպի Երեւան երթը մեկնարկել է շաբաթ օրը։
Նելլի ԳՐԻԳՈՐՅԱՆ
