Մայիս 5-ին աշխարհահռչակ ջութակահար Սերգեյ Խաչատրյանը Արամ Խաչատրյան համերգասրահում իբրեւ մենակատար հանդես եկավ Հայաստանի ազգային ֆիլհարմոնիկ նվագախմբի ընկերակցությամբ: Նա ցանկացած համերգի ավարտին, անկախ նրանից, թե որ երկրում է կայանում համերգը եւ ինչ ծրագրով, միշտ Կոմիտաս կամ Նարեկացի է կատարում:
Այս համերգին էլ ջութակահարը Նարեկացու «Հավուն-հավունը» նվագեց:
«Այս դժվար օրերին, որ մենք հիմա ապրում ենք, սա դառնում է էլ ավելի կարևոր։ Դա մի գործ է, որը գալիս է մեր պատմակա´ն Հայաստանից։ Ոմանք փորձում են մոռանալ կամ մոռացության մատնել ազգին իր պատմական մշակույթից, ակունքներից։ Ես կարծում եմ, որ այդպիսով իմաստ չի ունենա ընդհանրապես գոյատեւել որպես հայ, որովհետև առանց մեր պատմության, եւ առանց պատմական թե´ Հայաստանի, թե´ մշակույթի, որն, ինձ թվում է, կարելի է նույնականացնել… Առանց այդ արժեքների ես, համենայնդեպս, իմաստ չեմ տեսնի ապրելու և ստեղծագործելու…»,-ասաց աշխարհի հեղինակավոր բեմերում ու ամենահայտնի նվագախմբերի (Berliner Philharmoniker, Royal Concertgebouw Orchestra, Radio Filharmonisch Orkest, Rotterdam Philharmonic, Orchestre National de Belgique, London Symphony, London Philharmonic, Philharmonia Orchestra, NHK Symphony և Melbourne Symphony) հետ հանդես եկած ջութակահարը:
Հավելենք, որ Սերգեյ Խաչատրյանը նվագում է Իզայիի Գվարների ջութակով (1740), որը նրան տրամադրել է Nippon Music Foundation-ը:
Կարդացեք նաև
Գոհար ՀԱԿՈԲՅԱՆ
