Կիրանցում քիչ առաջ Բագրատ Սրբազանը հայտարարեց պայքարի նոր մեկնարկի մասին:
Նա ասաց, որ բոլորով Կիրանցից շարժվում են դեպի Երեւան. «Անհասկանալի պատճառներով գյուղի այս տարածքները հանձնում են: Ինչ ենք դիմացը ստանում, ըստ վկայողի, ստանում ենք ռիսկերի նվազում: Այս բոլորին ականատես լինելով՝ «Տավուշն հանուն հայրենիքի» շարժումը որոշեց իր ժողովրդով գնալ Երեւան ու պատասխաններ պահանջի ու պահանջ ձեւակերպի, որ այս գործընթացը պետք է դադարի: Միակողմանի զիջումների այս աղետալի ընթացքը, որը վերջ չունի, սահման չունի, դրան հաջորդելու են այսպես կոչված անկլավների խնդիրը, Տիգրանաշենի, Սյունիքի խնդիրները եւ այլն: Այսինքն, հյուսիսից հարավ անհասկանալի գործընթացի մեջ ենք գտնվում, ու այս գործընթացը պետք է կասեցվի: Սա մեր պահանջն է: Եթե սահմանագծման, սահմանազատման խնդիրներ կան, դրանք պետք է տեղի ունենան ՀՀ օրենքներին համապատասխան ու միջազգային պայմանագրերի հիմունքների, սկզբունքների վրա, այլ կերպ չի կարող լինել: Միակողմանի, միանձնյա որոշումներ՝ մոլորեցնող, խաբեբայական, այլ դրսեւորումներ չեն կարող լինել»:
Բագրատ Սրբազանը հայտարարեց, որ սա «չակնկալիքների» շարժում է, որի դիմաց ստանալու ենք հայրենիք եւ պատիվ. «Այս շարժումը նաեւ պատճառ ու միջոց պիտի դառնա հասարակական լայն հաշտության: Այստեղ ո՛չ ատելություն կա, ո՛չ թշնամություն, ո՛չ հակակրանք: Ովքեր այսպիսի տրամադրությամբ կփորձեն մտնել այս շարժման մեջ, նրանք կապ չունեն ընդհանրապես ո՛չ մեր հայության հետ, ոչ մեր իղձերի հետ,ոչ մեր շարժման հետ, ոչ մեր գոյության հետ: Սա լայն հասարակական հաշտության շարժում է, որը միտված է բարին ստեղծելու եւ ճշմարտություն արտահայտելու»:
Բագրատ Սրբազանը հիշեցրեց, որ զգուշացրել էր՝ չփորձեք դիպչել Տավուշին, դա լինելու է մեր ստորացման վերջին մեխը:
Կարդացեք նաև
Բագրատ Սրբազանը, կիրանցի Լենա տատիկից ծնկաչոք օրհնություն ստացավ՝ ճանապարհ ընկնելուց առաջ: Նրան հետեւեցին ներկաները՝ «Հայաստան» խմբակցության պատգամավոր Գառնիկ Դանիելյանը, քաղաքագետ Սուրեն Պետրոսյանը, երգիչ Արսեն Գրիգորյանը:
Հռիփսիմե ՋԵԲԵՋՅԱՆ
