Հայաստանը շարունակում է մնալ ՀԱՊԿ լիիրավ անդամ և պետք է կատարի համապատասխան պարտավորությունները․ արտաքին քաղաքականության ընթացիկ հարցերի վերաբերյալ ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան:
«Չնայած կազմակերպության հասցեին անընդհատ հնչող մեղադրանքներին, դրա անդամակցության հետ կապված ՀՀ-ն որևէ նոր քայլ չի ձեռնարկել», – նշել է նա:
ՀԱՊԿ շրջանակներում Հայաստանի պարտավորությունների թվում Զախարովան հիշատակել է 1992թ.-ին Հավաքական անվտանգության մասին պայմանագրով և 2002թ. կազմակերպության կանոնադրությամբ ամրագրվածները։
Անդրառնալով Դաշնության խորհրդի՝ ՀՀ ԱԺ ուղարկած հարցմանը ՌԴ ԱԳՆ պաշտոնական ներկայացուցիչն ասել է. «Հուսով եմ, որ նման հայտարարություններ անողները բավականաչափ ուժ կունենան պատասխան ուղարկելու ՌԴ խորհրդարանականներին: Պատասխանը ստանալուն պես ուշադիր կուսումնասիրենք և անհրաժեշտության դեպքում հրապարակային կմեկնաբանենք»:
Կարդացեք նաև
Ավելի վաղ ԵՄ անդամ պետությունների խորհրդարանների նախագահների համաժողովի ժամանակ ՀՀ ԱԺ նախագահ Ալեն Սիմոնյանը ՌԴ-ին մեղադրել էր ՀՀ-ի դեմ «սպառնալիքների և ապատեղեկատվության արշավ» կազմակերպելու մեջ, ինչպես նաև հայտարարել էր «ՌԴ-ի կողմից Ուկրաինա ներխուժման» մասին:
