Հայաստանի ծանրամարտի ֆեդերացիայի գլխավոր քարտուղար եւ տղամարդկանց ազգային հավաքականի գլխավոր մարզիչ Փաշիկ Ալավերդյանը «Արմենպրեսի» մամուլի սրահում լրագրողներին պատմեց սպորտի վերադաս պետական կառույցի հետ արդյունավետ աշխատելու գրեթե անհնարինության մասին՝ անգամ երեք ամիս հետո Փարիզում մեկնարկող օլիմպիական խաղերին նախապատրաստվելու այս կարեւոր փուլում։
Նա բերեց բազմաթիվ օրինակների մի մասը միայն՝ հորդորելով իր ասածներն անպայման հրապարակել առանց որեւէ բան պակասեցնելու կամ ավելացնելու։
«Օլիմպիական վարկանիշ ձեռք բերելու համար անցել ենք բոլոր փուլերը։ Հինգ մարզիկ օլիմպիական վարկանիշ ձեռք է բերել, բայց Խաղերին կարող է մասնակցել առավելագույնը երեք ծանրորդ։ Մենք արդեն որոշել ենք անունները եւ ուղարկել ՄՕԿ։ Նրանք են. 89 կգ քաշային կարգ՝ Անդրանիկ Կարապետյան, 102 կգ՝ Գարիկ Կարապետյան եւ ծանր քաշ Վարազդատ Լալայան։
Ինչպիսի՞ պատրաստություն ենք անցկացնում։ Ցավոտ կողմերից մեկը դա է։ Բանն այն է, որ ովքեր պետք է մեր հետ աշխատեն՝ նախարարությունը վարչությունները եւ այլն, կոշտ ասեմ. այդ ոլորտում գիտելիքներ չունեն։ Իսկ նա, ով ունի, նրա ձայնը լսելի չէ։ Ես, օրինակ, այդ մարդու փոխարեն, այնտեղ 15 րոպե չէի աշխատի»,-ասաց պարոն Ալավերդյանը՝ հավելելով, որ այդ մարդիկ, ճիշտ է, պատասխանատվությունը կրում են, սակայն ձեռքներին հնար չկա։
Կարդացեք նաև
Փաշիկ Ալավերդյանը նշեց, որ մինչեւ այսօր իրենք մեկ լումա չեն ստացել վիտամինների եւ վերականգնիչների համար։
«Այսօր այստեղից ես պետք է գնամ, պայմանագիրը ստորագրեմ։ Նոր են պատրաստել։ Ինչո՞ւ չեն տալիս։ Կան բավականաչափ դժվարություններ եւ իրենց համար, եւ մեզ համար։ Իրենց համար, որովհետեւ գիտելիքներ չունեն, մեզ համար, որ գումար չեն փոխանցում։
Ես, օրինակ, իմ դժվարությունները հաղթահարել եմ ամբողջությամբ՝ օլիմպիական կոմիտեի հետ միասին բոլոր վիտամինները գնել եմ։ Իսկ պետական կառույցն ինչի՞ չի տվել։ Ասում են՝ պետք է գնեք գնումների հայտարարություն տալու միջոցով՝ մրցույթ պետք է հայտարարվի։ Լավ, հասկացանք։ Բայց պատկերացնո՞ւմ եք, թե ինչ է վիտամինները, վերականգնիչները մրցույթով գնել։ Նախ, այդ վիտամինը պետք է լինի միջազգային ֆեդերացիայի կողմից լիցենզավորված։ Ամեն մի պատահական բան չի կարող գնվել, որովհետեւ այսօր բոլոր վերականգնիչների մեջ կան արգելված նյութեր։ Ինչի՞։ Որպեսզի մարզիկը արագ արդյունք ցույց տա, իրենց ապրանքն էլ վաճառվի։
Դրա համար մենք խնդրել էինք, որ գնումներն անենք մեկ անձից, չնայած, էլի չեն արել։ Հիմա չգիտենք, թե դա ինչ անենք։ Երեւի պատանիներին, երիտասարդներին բաժանենք՝ վերջանա, գնա։
Բայց մենք արդեն ամեն ինչ արել ենք, մարզիկները պատրաստ են երեք ամիս հետո մասնակցել օլիմպիական խաղերին եւ հուսով ենք, որ ցույց կտան իրենց լավագույն արդյունքները»,-ասաց մասնագետը։
Աշոտ ՀԱԿՈԲՅԱՆ
