ՀՀ կենտրոնական բանկի որոշմամբ ՝ 0.25 տոկոսային կետով իջեցվել է վերաֆինանսավորման տոկոսադրույքն, այն սահմանելով 8.25%: Այս մասին այսօր հրավիրված ասուլիսում հայտարարեց ԿԲ նախագահ Մարտին Գալստյանը։
«Կենտրոնական բանկի խորհուրդը գնահատում է, որ քաղաքականության ավելի ցածր տոկոսադրույքն անհրաժեշտ է միջնաժամկետում գնաճի 4% մակարդակի եւ գների կայունության նպատակի իրագործման համար»,-ասաց Գալստյանը:
Այս տարվա առաջին եռամսյակում 12-ամսյա գնաճը, ինչպես ներկայացրեց ԿԲ նախագահը, շարունակել է նվազել, մարտին այն կազմել է -1.2%, նաեւ նվազել է 12-ամսյա բնականոն գնաճը՝ մարտին կազմելով -0.7%:
2024 թվականի առաջին եռամսյակում համաշխարհային եւ Հայաստանի հիմնական գործընկեր երկրներում տնտեսական աճի դանդաղման ռիսկերը պահպանվել են, համաշխարհային գնաճը շարունակում է դանդաղել, սակայն, Գալստյանի ներկայացմամբ՝ գործընկեր երկրներում ապրանքների եւ ծառայությունների գները դեռեւս մնում են բարձր:
Կարդացեք նաև
«Տարեսկզբից Մերձավոր Արեւելքում ստեղծված աշխարհաքաղաքական լարվածությունը շարունակում է որոշակի ռիսկեր առաջացնել էներգակիրների համաշխարհային գների հետագա աճի եւ առաջարկի արժեշղթաների հնարավոր խաթարման տեսանկյունից: Այս համատեքստում հավանական է, որ գործընկեր երկրների կենտրոնական բանկերը, (մասնավորապես՝ ԱՄՆ ֆեդերալ պահուստային համակարգը) առաջիկայում ավելի երկար կպահպանեն դրամավարկային խիստ պայմանները: Արդյունքում՝ արտաքին հատվածից ՀՀ տնտեսության վրա ակնկալվում են թույլ գնանկումային ազդեցություններ»,-ասաց Գալստյանը:
Նրա փոխանցմամբ՝ այս տարվա առաջին եռամսյակում մեր երկրում պահպանվել է բարձր տնտեսական ակտիվություն, որին հիմնականում նպաստել է առեւտրի եւ արդյունաբերության ճյուղերի զգալի աճը․ «Վերջինս շարունակում է կրել որոշ կարճաժամկետ գործոնների ազդեցությունը՝ պարունակելով էական անորոշություններ տնտեսական աճի կայունության եւ երկարաժամկետ հեռանկարի տեսանկյունից: Ներքին ծառայությունների նկատմամբ արտաքին պահանջարկը թուլանում է, իսկ ներքին պահանջարկին շարունակում է նպաստել մասնավոր ներդրումների բարձր աճը: Միեւնույն ժամանակ հարկաբյուջետային քաղաքականության կողմից պահանջարկի լրացուցիչ խթանման ռիսկերը շարունակում են մնալ առարկայական»։
Գալստյանի ներկայացմամբ՝ ԿԲ խորհուրդը հավասարակշռելով ռիսկերը, որոշել է շարունակել դանդաղ տեմպերով աստիճանական թուլացումը․ «Խորհուրդը կշարունակի մշտադիտարկել տնտեսության զարգացման սցենարները եւ պատրաստ է ձեռնարկել համարժեք գործողություններ՝ միջնաժամկետ հորիզոնում գնաճի 4% մակարդակի եւ գների կայունության նպատակի ապահովման համար»:
Մանրամասն՝ տեսանյութում
Նելլի ԲԱԲԱՅԱՆ
