Հայտնել ենք, որ այսօր «Մայր Հայաստան» խմբակցության անդամները Երեւանի բուհերում ցույց են անում՝ ի աջակցություն Տավուշի եւ Հայաստանի:
ԵՊՀ-ի տարածքում հանդիպեցին ԿԳՄՍ նախկին նախարար Վահրամ Դումանյանին: Մանուկ Սուքիասյանը նրան հարցրեց՝ մենք սրա՞ համար ենք պայքարել, որ երկիրն այսպես խեղճացած վիճակում տեսնենք. «Սա համարում եք նորմա՞լ, հա՞: Ասենք, ընդդիմությունն իր քաղաքական տեսակետն ունի, դա դնենք մի կողմ, երկիրն էս վիճակի որ հասել է՝ թուրքի առաջ ծնկի եկած, շանտաժով, առանց սահմանագծման կտոր-կտոր տալիս ենք, որ կռիվ չլինի, երաշխիք էլ չկա, որ չի լինի: Տալով՝ պատերազմ կանխվո՞ւմ է ըստ ձեզ»:
Ի պատասխան՝ Դումանյանն ասաց. «Մենք էն ժամանակ էլ, հիմա էլ պիտի որակումներից զերծ մնանք՝ տալով, ծնկի գալով, էդ արտահայտությունները ցիվիլ չեն, էլի: Ես ծնկի եկած չեմ: Մենք ունեցել ենք խնդիրներ, ունենք ու ունենալու ենք: Անխնդիր վիճակ գոյություն չունի բոլոր ժամանակներում, բոլոր երկրներում»:
Կարդացեք նաև
Անդրանիկ Թեւանյանը հարցրեց՝ ձեր դիրքորոշումը ո՞րն է: Դումանյանը պատասխանեց. «Ես չեմ ուզում ձեր հետ կիսվեմ իմ դիրքորոշմամբ: Լրագրո՞ղ եք»:
Թեւանյանը զարմացավ. «Ինչի՞, պահում եք ձեր համա՞ր, ձեր տա՞նը»:
Դումանյանի պատասխանը հեգնական էր. «Ո՞նց: Գամ ձե՞ր տանը պահեմ, ձե՞զ ինչ որտեղ եմ պահում, ինչի՞ եք իմ տուն մտնում, իմ տան ներսի կառուցվածքի մեջ խորանում»: Թեւանյանն ասաց, որ կարմիր գծերը չանցնի, Դումանյանն էլ պահանջեց ասել, որ վրիպել է. «Իմ տեսակետն էլ մամուլի իմ հարցազրույցները կարդացեք՝ կիմանաք»:
Վեճը փորձեց հարթել Մանուկ Սուքիասյանը: Նա հարցրեց, թե ո՞րն է այնուամենայնիվ ստեղծված իրավիճակում իր դիրքորոշումը՝ Դումանյանը պատասխանեց. «Իմ դիրքորոշումն է՝ ամեն մարդ պիտի իր գործը լավ անի: Ես, ինչպես միշտ, եղել եմ համալսարանական, շարունակում եմ մնալ»:
Ըստ Դումանյանի, երկրում լիքը խնդիրներ լուծվել են, լիքը խնդիրներ էլ դեռ կան, որ պիտի լուծվեն:
Հեռանալիս Թեւանյանը հորդորեց տեսակետը հրապարակային հայտնել. «Դա վնասակար չի»:
Հռիփսիմե ՋԵԲԵՋՅԱՆ
