«Ես ինչքան ուզում եմ այս գործընթացը մտցնել իրավական ոլորտ, մեր հարգելի դատախազությունը՝ իր պատվարժան ներկայացուցչի գլխավորությամբ, տանում շպրտում է քաղաքական ոլորտ»,- այսօր դատարանում հայտարարեց Վանաձորի նախկին քաղաքապետ Մամիկոն Ասլանյանը՝ նաեւ հավելելով, որ կարծես իր մոտ ստոկհոլմյան սինդրոմ է առաջանում, ու այս գործով ինքն է անընդհատ դատարանին ու դատախազությանը պաշտպանում: Նա նկատեց, որ հանրային մեղադրողը դատավարության բոլոր փուլերում իր նկատմամբ քաղաքական պատանդառությամբ է զբաղված՝ «բոլշեւիկյան ցինիզմով» ոտնձգություն կատարելով մարդու անքակտելի իրավունքներից մեկի՝ ազատության իրավունքի նկատմամբ:
Հանրային մեղադրողը վրդովվեց Մամիկոն Ասլանյանի դիտարկումներից, ասաց, որ Մամիկոն Ասլանյանի անդրդվելի մնալը, նման որակումներով խոսելը ապացուցում են իր իրավացիությունը. «Եթե որեւէ մեկը որոշել է այստեղ մեղադրողի համբերությունը չափել, խորհուրդ չեմ տա, դա ոչ մի լավ բանի չի բերի»: Մեղադրողը միջնորդեց՝ սանկցիա կիրառել ամբաստանյալի նկատմամբ: Դատարանը անհրաժեշտություն չտեսավ սանկցիա կիրառելու, ինչն ավելի վրդովվեցրեց մեղադրողին: Դատարանն էլ մինչ այդ զգուշացրեց Մամիկոն Ասլանյանին՝ զուսպ լինել արտահայտություններում:
ՀՀ հակակոռուպցիոն դատարանում դատավոր Սարգիս Դադոյանի նախագահությամբ այսօր շարունակվեց Վանաձորի նախկին համայնքապետ Մամիկոն Ասլանյանի գործով հերթական դատական նիստը: Դատարանը նախորդ նիստում ավարտեց վկաների հարցաքննությունը: Այսօր դատարանը քննեց Մամիկոն Ասլանյանին կալանքից ազատելու՝ պաշտպանական կողմի միջնորդությունը : Մեղադրողն առարկել էր միջնորդության դեմ:
Ի դեպ, արձագանքելով պաշտպանական կողմի դիտարկմանը, թե մինչ այժմ հայտնի չէ, թե Մամիկոն Ասլանյանն ի՞նչ հոդվածով է մեղադրվում, հանրային մեղադրողն ասաց, որ դատավարական փուլում այդ մասին բազմիցս պարզաբանումներ տրվել են եւ քրեական օրենսգրքի փոփոխությունը հիմք չի հանդիսանում մեղադրանքի փոփոխության համար: Այլ հարց, թե որոշում ընդունելիս դատարանը ինչպե՞ս կառաջնորդվի
Կարդացեք նաև
Դատարանը հեռացավ խորհրդակցական սենյակ՝ որոշում կայացնելու: Որոշման եզրափակիչ մասը կհրապարակվի վաղը՝ 9.30-ին:
Նելլի ԳՐԻԳՈՐՅԱՆ
